Türkiyədə bu yayın ən çox diqqət mərkəzində olan klubların başında gələn ''Fənərbaxça'' ilə bağlı yeni xəbərlər var.

Ötən sayımızda ''Fənər''in Tyaqo Çukur və Coşua Kinqi danışıqlar üçün İstanbula dəvət etdiyini xəbər vermişdik. Bu oyunçuların transferi yekunlaşıb. 19 yaşlı Çukur ilə dördillik, 30 yaşlı Kinq ilə ikiillik müqavilə imzalanıb. Bundan başqa, İstanbul nəhəngi ''Flamenqo''dan braziliyalı dayaq yarımmüdafiəçisi Villian Araonun da transferini tamamlayıb. 30 yaşlı futbolçu ilə ''2+1'' illik müqavilə imzalanıb. Türkiyə mətbuatının yazdığına inansaq, bu transfer komandaya 2 milyon avroya başa gəlib. Araonun illik məvacibi isə 1,2 milyon avro təşkil edəcək. Maraqlıdı ki, təcrübəli futbolçu karyerasında ilk dəfə legioner həyatı yaşayacaq. Braziliya yığmasında 1 oyun keçirən və 2016-dan bəri ''Flamenqo''nun uğurları üçün tər tökən Arao daha öncə ''Korintians'', ''Portugeza'', ''Şapekoense'', ''Atletiko Qoyanense'' və ''Botafoqo''da çıxış edib. Onu da bildirək ki, ''Fənər'' öz yetirməsi olan 19 yaşlı sol müdafiəçi Arda Okan Kurtulanı ''Adana Dəmirspor''a verib. Adana klubu bu oyunçu ilə ''3+1'' illik müqavilə imzalayıb. Amma müqaviləyə salınan xüsusi maddəyə görə ''Fənər''in 3 ildən sonra müəyyən məbləğ ödəyərək bu oyunçunu geri qaytarmaq haqqı var.

Bu arada Çempionlar Liqasının 2-ci təsnifat mərhələsi çərçivəsində Kiyev ''Dinamo''su ilə oyuna hazırlaşan ''Fənərbaxça''nın UEFA-ya göndərdiyi iştirak ərizəsi məlum olub. Orda bir sıra sürprizlər diqqəti çəkir. Əvvəlcə qeyd edək ki, 2016-cı ildə UEFA ilə imzalanan ''maliyyə feyr-pleyi'' anlaşmasının müddəti başa çatdığı üçün ''sarı-lacivərdlilər'' 6 illik fasilədən sonra avrokubokların iştirak ərizəsinə 23 yox, 25 futbolçunun adını yazdıra bilib. Ən böyük sürpriz siyahıda Kim Min Çjenin adının olmamasıdı ki, bu haqda az sonra danışacağıq. Yeni transferlərdən Tyaqo Çukurun da adı siyahıya salınmayıb və bu da başadüşüləndi. Gənc futbolçunun heç bir beynəlxalq təcrübəsi yoxdu və necə çıxış edəcəyi bilinmir. Bu iki futbolçudan başqa Jorje Jezuşun planlarına daxil olmayan daha 8 oyunçu - Marsel Tisseran, Luis Qustavo, Nazim Sanqare, Maurisio Lemos, Stiven Koker, Çağtay Kurukalıp, Maks Mayer və Mbvana Samatta da kənarda qalıb. Yəni ümumilikdə 10 futbolçu iştirak ərizəsinə salınmayıb.

Kim Min Çjeyə gəlincə, müdafiənin dirəyi sayılan fanatların sevimlisi komandanı tərk etmək üzrədi. ''Napoli'' və ''Renn''in hədəfində olan 25 yaşlı futbolçu fransızlara qismət olub. ''Renn'' bu keçidə görə 18 milyon avro ödəyəcək! Kim 1999-da ''Real''a 21 milyon avroya transfer olunan bosniyalı Elvir Baliçdən sonra ''Fənərbaxça'' tarixində ən baha qiymətə satılan 2-ci futbolçudu. Onun ötən yay cəmi 3 milyon avroya transfer olunduğunu nəzərə alsaq, bu satışa görə ''Fənər''i yalnız alqışlamaq olar. Ümumiyyətlə, bu, Əli Koçun dönəmində ''sarı-lacivərdlilər''in 10 milyon avrodan baha qiymətə reallaşdırdığı 5-ci satışdı. Daha öncə Juliano 10,5 milyon avroya, Jozef de Souza 12 milyon avroya, Elif Elmas 16 milyon avroya və Vedat Muriqi 17,5 milyon avroya satılmışdı. Özü də nəzərə alaq ki, Elmas cəmi 180 min avroya, Muriqi isə 3,5 milyon avroya transfer edilmişdi. Ümumilikdə Əli Koçun dördillik dönəmində ''Fənərbaxça'' oyunçu satışından artıq 95 milyon avro qazanıb!

ƏLİ