Çempionlar Liqasında mübarizəni dayandırmalı olan ''Fənərbaxça''nın transferləri davam edir.
"Football-plus.az" xəbər verir ki, İstanbul nəhəngi dünən axşam saatlarında daha iki yeni oyunçunun keçidini rəsmən açıqlayıb. Söhbət braziliyalı müdafiəçilərdən - Qustavo Enrike ilə Luan Peresdən gedir. İstanbula hələ çərşənbə axşamı gələn Enrikenin tibbi müayinəsi zamanı müəyyən problemlər çıxsa da, göründüyü kimi, sonda keçid baş tutub. 2020-dən bəri ''Flamenqo''nun şərəfini qoruyan 29 yaşlı mərkəz müdafiəçisi birilliyə icarəyə götürülüb. Maliyyə detalları barədə məlumat verilmir. Enrike 196 sm boya malikdisə, Peresin 190 sm boyu var. O, mərkəz müdafiəçisindən başqa sol müdafiəçi kimi də oynamağı bacarır. ''Fənər'' Pereslə üçillik müqavilə imzalayıb. Bu transfer kluba 5 milyon 225 min avroya başa gəlib. Bundan başqa, oyunçunun performansından və qazanılan nəticələrdən asılı olaraq Peresin əvvəlki klubu ''Marsel''ə maksimum 237 min 500 avro bonus ödəniləcək. Qeyd edək ki, ''Portuqeza''nın yetirməsi olan Peres bu klubdan başqa ''İtuano'', ''Ponte Preta'', ''Fluminense'', ''Brügge'' və ''Santos''un şərəfini qoruyub. Bu oyunçu ötən yay 4,5 milyon avroya ''Marsel''ə transfer olunmuş və türkiyəli Cengiz Ündər ilə eyni gündə müqavilə imzalamışdı. Peres mövsümboyu 33 rəsmi oyuna çıxaraq 2 məhsuldar ötürmə vermişdi.
Yeri gəlmişkən, ''Fənərbaxça'' 5 futbolçunun zədəsi ilə bağlı rəsmi açıqlama verib. ''Dinamo'' ilə 120 dəqiqəlik ağır oyundan sonra Fərdi Kadıoğlu ilə İrfan Can Kahvecidə əzələ, qapıçı Altay Bayındırda diz zədəsi aşkarlanıb. Coşua Kinqin ayağında burxulma olub. Maraqlıdı ki, ''Dinamo'' ilə oyunda iştirak etməyən yeni transfer Joao Pedronun da əzələsində yırtıq aşkarlanıb.