"Xankəndiyə getməyin, ordakı stadiondan matç izləməyin xoşbəxtliyini, sevincini sözlə ifadə etmək çətindi. Həmin anı yaşamaq lazımdı. Müzzəfər Ali Baş Komandanın da stadionda gəlməsi, topa ilk zərbəsi, nitq söyləməsi qürurverici idi. Həqiqətən də çox gözəl hislər yaşadım. Elə "Qarabağ" - MOİK qarşıdurmasından da zövq aldım. Ağdam təmsilçisinin gücü hamıya bəllidi, ona görə də daha çox "hərbçilər" haqqında söz açmaq istərdim. 1-ci liqa təmsilçisi "köhlən atlar"a qarşı yaxşı mübarizə apardı. Adətən, elita təmsilçiləri belə "Qarabağ"a qarşı açıq futbol sərgiləyə bilmir. Amma MOİK Avropa səviyyəli komandamıza qarşı döyüşdü, müqavimət göstərdi. Hətta fasilədən sonra Qurban Qurbanovun yetirmələri komanda şəklində hücum etsələ də, "hərbçilər" təslim olmadı. Qısası, Qəzənfər Abbasov çox yaxşı, mübariz komanda formalaşdırıb. Onları gözəl oyuna görə təbrik edir, uğurlar arzulayıram. Mən Füzulidənəm, qarabağlıyam və Qarabağ aşiqiyəm. Çox istəyərdim ki, Xankəndidə tez-tez futbol matçları keçirilsin. Bu şəhərin öz komandasının qısa zamanda yaradılmasını istəyirəm. Şükürlər olsun ki, işğaldan azad olunmuş torpaqlarımızda yenidənqurma işləri aparılır. Cənab Prezidentin göstərişiylə Ağdamda “İmarət” stadionunun tikilməsinə başlanılıb. Xankəndidə hazır stadion var, burda tez-tez matçlar keçirilsə, futbolu populyarlaşdırsaq, əla olar. Hətta deyərdim ki, MOİK Xankəndi təmsilçisinə çevrilsə və ev oyunlarını orda keçirsə, çox gözəl olardı. Özüm dövlət işində çalışıram. Amma çox istəyərdim ki, gələcəkdə elə mən də Xankəndidə işləyim və bu şəhərdə futbol bayramlarına şahidlik edim".