"Xeyli vaxtdı "Qarabağ"ın Xankəndidə oyun keçirəcəyi barədə söhbətlər gəzirdi. Ancaq rəsmi heç bir məlumat yox idi. Sonra klubdan əlaqə saxlayıb belə bir səfər olacağını, bizim də iştirak edə biləcəyimizi dedilər. O anda sevincimin həddi-hüdudu yox idi. Tez azarkeş rəfiqələrimə xəbər verdim və sənədlərimizi qeydiyyat üçün göndərdik. Oyun günü gəlib çatmışdı. Hər şey yuxu kimi idi. “Koroğlu” metrosunun çıxışında sıra ilə düzülmüş avtobuslar azarkeşləri tarixi torpaqlarımıza aparacaqdı. Səfər zamanı rahat olmağımız üçün hər cür şərait yaradılmışdı. Avtobusun oturacaqlarının üstündə hər birimizə yemək, su, şirniyyat, meyvə, oyun üçün hazırlanmış xüsusi şarf, papaq, gigiyena üçün salfetlər qoyulmuşdu. Səfər başlayanda həyəcan da artmağa başladı. Bizim avtobusda olan qarabağlılar yolboyu keçdiyimiz yerlərin, kəndlərin adını deyir, xatirələrini danışır, biz də qulaq asırdıq. Nəhayət, Xankəndiyə çatdıq. Şəhərin hər yerində tərk edilmiş evlər, boşaldılmış, qapıları açıq qalan mağazalar, ticarət mərkəzləri, apteklər vardı. Avtobusdan düşməyə icazə yox idi. Ancaq şəhərin içindən keçdikcə bacardığımız qədər hər şeyi görməyə çalışırdıq. Bu minvalla gəlib stadiona çatdıq. Mənzərə çox gözəl idi. Şou-proqram təşkil olunmuşdu. “İmarət”dəki son qolumuzun müəllifi Yaşar Hüseynov və sabiq futbolçumuz Əfran İsmayılovla görüşdük, xatirə şəkli çəkdirdik, matçı izlədik. Oyun o qədər də baxımlı olmasa belə, səfərin, ora ayaq basmağın, ilk oyun üçün ora yollanan azarkeşlərdən olmanın verdiyi sevinc hissini sözlə ifadə edə bilmərəm. Prezident çıxışı zamanı "ordu ilə Qarabağ bir yerdədirsə, deməli, qalib gələn xalqdı" dedi. Bu anda ağlımdan bir şey keçdi. Liqadakı bütün klubların məşqçilərinin işi sadəcə, komandasını meydana çıxarmaq, qələbə qazanmaq, maksimum nəticə əldə etməkdisə, Qurban hocanın işi həm də Qarabağı təmsil etmək, bütün Azərbaycanı futbolla bir araya toplamaqdı. Bunu Droqbanın ölkəsində vətəndaş müharibəsini bitirməsi kimi böyük bir məsuliyyətlə eyniləşdirərdim. 30 illik işğal dönəmində bütün dünyaya "Qarabağ Azərbaycandı!" demək, müharibədən sonra Azərbaycanı "Qarabağ"la birlikdə Qarabağa aparmaq. Xankəndi səfərimiz mənə görə möhtəşəm oldu".