"Əvvəla onu deyim ki, yenidən Xankəndiyə qayıtmağımıza və orda futbol matçının keçirilməsinə görə çox sevincliyəm. Şükürlər olsun ki, futbolumuz da işğaldan azad olunmuş bölgələrə qayıdır. "Qarabağ" - MOİK matçının nəticəsindən asılı olmayaraq, futbolsevərlərin gözəl oyun izləyəcəyinə əminəm. Kubokdakı nəticələrə gəlincə, əlbəttə, premyer-liqa təmsilçiləri ilə 1-ci liqa klubları arasında səviyyə, peşəkarlıq, maliyyə, hətta stadionların vəziyyəti ilə bağlı da gecə-gündüz fərqi var. Bu da, təbii ki, özünü göstərir. Amma ən azı xoş məqam odu ki, bu mövsümdən 1-ci və 2-ci liqa təmsilçiləri də kubok turnirinə buraxıldı. Bunu ənənəyə çevirmək lazımdı. Çünki, nə qədər aşağı liqa komandaları elita klubları ilə oynayacaqsa, bu həm futbolumuzu inkişaf etdirəcək, həm də maraqlı edəcək. "İrəvan"la "Şamaxı" darmadağına üzüldülər. "Karvan"la "İmişli" yaxşı müqavimət göstərdi. Əslində "Qəbələ" - "İmişli" cütündə "qırmızı-qaralar"ın çoxlu qol fürsətləri oldu, tirdən-dirəkdən qayıdan toplar da vardı. Deməyim odu ki, "İmişli"nin bir az bəxti də gətirdi. "Şamaxı" "Səbail"ə müqavimət göstərsə də, ilk yarıda penaltidən buraxdığı topdan sonra ruhdan düşdü. "Dənizçilər" də bundan maksimum yararlandı. İndi 1-ci liqanın liderləri MOİK-lə "Qaradağ Lökbatan" elitanın iddialılarıyla qarşılaşacaq. Adətən, güclü rəqiblə oyunda aşağı liqa təmsilçiləri bacardıqca qapısını toxunulmaz saxlamaqla sensasiyaya gedən yolu axtarır. MOİK-lə "Qaradağ Lökbatan" ilk yarıda qapılarını toxunulmaz saxlasalar, daha maraqlı oyun gedəcək. Təbii ki, sensasiya olacağına inanmıram".