Misli premyer-liqasının 18-ci turunda keçirilən "Turan Tovuz" - "Araz-Naxçıvan" oyunu 81-ci dəqiqədə dayandırıldı.

"Football-plus.az" xəbər verir ki, buna səbəb stadionun sol küncündə yerləşdirilən projektor dirəyinin güclü külək üzündən qazonun üzərinə aşmasıdı.

Xoşbəxtlikdən həmin ərazidə hansısa şəxs olmadığından bədbəxt hadisə baş vermədi. Stadion dərhal boşaldıldı. Qeyd edək ki, digər projektor dirəkləri də təhlükə saçır. Yəni, güclü külək onları da tərpətməkdədi.

Vurğulayaq ki, hadisə baş verməzdən təxminən 25-30 saniyə əvvəl "Turan Tovuz"un ehtiyat oyunçuları məhz dirəyin aşdığı yerdə məşq edirdi.

PFL Əsasnaməsinə görə, oyunun dayandırılmasına səbəb olan hadisənin fəsadları 30 dəqiqə ərzində aradan qaldırılırsa, matç qaldığı yerdən davam edir. Bu alınmasa, görüşün taleyi ilə bağlı son qərarı PFL verəcək. Hadisə baş verən anda "Turan Tovuz" "Araz-Naxçıvan"ı məğlub edirdi - 2:1.

***
Oyun sabah saat 12.00-da qaldığı yerdən davam edəcək. Bu barədə "football-plus.az"a görüşün AFFA nümayəndəsi Mübariz Hüseynov məlumat verib.

KƏNAN BAHADIR, Tovuz