Dekabrın 17-də keçirilən son oyunla Argentina Liqa Kubokuna (LK) yekun vuruldu.

Həmin gün turnirin yeni qalibi məlum oldu.

final
Rosario Sentral - Platense 1:0
Lovera, 40.
Rosario Sentral: Broun, Kintana, D.Martines (Komar, 54), Malyo, Sandes (A.Rodriges, 82), Malkorra, Kampas, O’Konnor (Toledo, 82), Ortis, Lovera (Cakone, 75), Martines Dupuy (Byanki, 82).
Platense: Makanyo, Morqantini, Suso, İ.Vaskes, Losano, N.Kastro (Fereyra, 75), Okampo, F.Dias, Russo (Salasar, 68), R.Martines (Pikko, 67), M.Pelleqrino (Servetto, 51).

Xatırladaq ki, qrup mərhələsində 28 komanda iki qrupda birdövrəli sistemlə mübarizə aparıb. Qruplarda ilk 4 yeri tutanlar kubok uğrunda mübarizəni davam etdirmək hüququ qazanıblar.

Qrupu 1-ci və ya 2-ci yerdə başa vurmağın üstünlüklərinin olduğunu da qeyd edək. Belə ki, ilk iki yerin sahibləri 1/4 finalda digər qrupda uyğun olaraq 4-cü və 3-cü yerləri tutan komandalarla qarşılaşmaq hüququna malik idilər. A qrupunda ilk 4 yeri uyğun olaraq “Atletiko Urakan”, “River Pleyt”, “Banfild” və “Rosario Sentral”, B qrupunda isə “Rasinq”, “Qodoy Krus”, “Belqrano” və “Platense” tutmuşdu. Maraqlıdı ki, 1/4 finalda üç, yarımfinalda isə hər iki matçda qalib penalti seriyasından sonra müəyyənləşmişdi. Yarımfinalda “Platense” “Qodoy Krus”a, “Rosario Sentral” isə “River Pleyt”ə “lotereya” adlandırılan mübarizədə üstün gəlmişdi.

Nəticədə ortaya olduqca maraqlı fakt çıxmışdı: hər iki finalçı qruplarda 4-cü yeri tutanlar olmuşdu. Beləliklə, Santyaqo del Estero şəhərində keçirilən həlledici oyunda LK-nın yeni qalibi müəyyənləşdi. Belə ki, “Rosario Sentral” ilə “Platense” ilk dəfə finala vəsiqə qazanmışdı. Yaxşı ki, bu dəfə qalibi penalti seriyası ilə müəyyənləşdirməyə ehtiyac olmadı. Matç “Platense”nin azacıq üstünlüyü ilə keçdi. Argentina yığmasının 50 yaşlı sabiq hücumçusu Martin Palermonun çalışdırdığı komanda qapıya dəqiq zərbələr planında rəqibini 6:3 hesabı ilə üstələdi. “Rosario Sentral”ın 37 yaşlı qapıçısı Broun bütün zərbələri dəf etdi. Onun amplua üzrə həmkarı Makanyonun iki seyvi oldu. 26 yaşlı əlcək sahibi fasilə ərəfəsində rəqib hücumunun qarşısını ala bilmədi. Loveranın vurduğu qol 67 yaşlı Migel Russonun çalışdırdığı “Rosario Sentral”ın LK-da ilk qələbəsini rəsmiləşdirdi.

Bombardirlər: Passerini (Belqrano) – 10, Qondou (Arxentinos Xuniors) - 9, Bareyro (San Lorenso), Merentyel (Boka Xuniors) - 7.