Həftəsonu Türkiyə çempionatında böyük və prinsipial bir oyun var.

''Fənərbaxça'' bu mövsümkü inanılmaz qələbə seriyasını ''Trabzonspor''la ev oyununda da davam etdirməyə çalışacaq. Hər iki komanda oyuna itkilərlə çıxacaq.

Qaradənizlilərdə Trezeqe və Bakasetas zədə üzündən oyunu buracaq. ''Sarı-lacivərdlilər''də isə mərkəz müdafiəçisi qıtlığı yaşanır. Daha öncə Sərdar Əziz və Aleksander Cikunu itirən ''Fənər''də ötən həftə ''Pendikspor''a qarşı oyunda daha iki mərkəz müdafiəçisi - Rodriqo Bekao ilə Samet Akaydın zədələndi. Hər iki futbolçunun durumuna aydınlıq gəlib. Tibbi müayinə zamanı Sametdə ciddi zədə aşkarlanmayıb və o, böyük ehtimalla şənbə günü meydana çıxa biləcək. Amma Bekao belə desək, özü-özünə xəsarət yetirib. Əslində bu futbolçu ''Pendikspor''la oyunun lap əvvəlində zədələnmişdi və dərhal əvəzlənsəydi, bəlkə də zədə ciddi olmazdı. Amma fədakarlıq edərək oyuna davam edən və yalnız fasilədə əvəzlənən təcrübəli futbolçunun zədəsi daha da ağırlaşıb. Baldır əzələsində yırtıq aşkarlanan braziliyalı 2,5 aylığa sıradan çıxıb.

Bundan başqa Fred də son oyunda zədə almış və erkən əvəzlənmişdi. Onun isə 3 həftəliyə sıradan çıxdığı məlum olub. Beləliklə, Ciku, Bekao və Fredin ''Trabzonspor''la oyunu buraxacağı dəqiqləşib.

ƏLİ