Xəbər verdiyimiz kimi, Arda Gülər ötən həftənin əvvəlində yenə zədə almışdı.

“Football-plus.az” xəbər verir ki, bu dəfə sol ayağının arxa əzələsindən zədələnən gənc türkiyəli ulduz “Real”a transfer olunduğu vaxtdan bəri artıq ikinci dəfə sıradan çıxıb. Bu dəfə o, ən azı üç həftə topa toxuna bilməyəcək. Eynilə Arda kimi bu yay Madrid nəhənginə gələn Cud Bellingem artıq indidən komandanın liderlərindən birinə çevrildiyi halda, türkiyəli hələ heç debüt matçına da çıxmayıb! Bu arada ispaniyalı həmkarlarımız Ardadan “Real”a fayda gəlmədiyini görərək onun kluba vurduğu ziyanı hesablamağa başlayıblar. Bilindiyi kimi, yayda “Real”la “Barselona” arasında 18 yaşlı futbolçuya görə gərgin rəqabət yaşanmışdı. “Kral klubu” sonda Ardanı “Fənərbaxça”dan “20+10” milyon avroya transfer edərək bu rəqabətdən qalib ayrılmışdı. Türkiyə yığmasının üzvünün transferi iyulun 7-də açıqlanıb. Ardanın həftəlik maaşı 100 min avrodu. Geridə qalan 12 həftəlik müddətdə “Real” Ardaya 1,2 milyon avro ödəyib. Gülərin hələ ən azı 3 həftə də oynamayacağını nəzərə alsaq, onun Madriddə meydana çıxmadan qazanacağı məbləğ 1,5 milyon avroya çatacaq!

Yeri gəlmişkən, İspaniya mətbuatında yayılan şayiələrə inansaq, Arda yanvarda “Real”ı tərk edə bilər. “Todo Fichajes”in iddiasına görə, rəhbərlik türkiyəli vunderkindi icarəyə verməyin əleyhinə deyil. Takefuso Kubo və Braim Diasın timsalında olduğu kimi “Kral klubu” Ardanın icarədə oynayaraq səviyyəsini artırmasının əleyhinə deyil. Ona “Real Sosyedad” və “Betis”in maraq göstərdiyi deyilir. Əslində “Betis” yayda da Ardanı icarə əsasında heyətinə qatmaq istəmişdi. Amma bu futbolçu yayda “Real”a gələn kimi dərhal başqa kluba icarəyə yollanmaqdan imtina etmişdi. O, komandada qalaraq əsas heyətə düşmək uğrunda rəqabət aparmağa üstünlük vermişdi. Amma göründüyü kimi, hələ ki şanssızlıq Arda Gülərdən əl çəkmir.