“Qəbələ” daha 3 xal qazanaraq turnir cədvəlindəki mövqeyini gücləndirmək istəyirdisə, “Kəpəz” sonuncu pillədən qurtulmağı hədəfləmişdi.

İlk dəqiqələr qarşılıqlı hücumlar şəraitində keçdi. Öncə “qırmızı-qaralar” Tettehin baş rol ifaçısı olduğunu hücum cəhdinin müəllifi oldu. Lakin Rodrigesin diqqətli çıxışı sayəsində təhlükə sovuşdu. Bu, qonaqların əl-qol açması üçün ideal fürsət idi. 6-cı dəqiqədə Martins Papunaşvilini vaxtında gördü. O, dərhal komanda yoldaşına ötürmə verdi. Bu epizodda gürcü oyunçunun ustalığını izlədik. Georgi Martinsin bilmədən ona mane olmasından qurtularaq topu tora qovuşdurdu. İlk yarıda yeganə qolu qonaqlar vurdu. Amma bu, birinci hissədə bitənə qədər oyunun süst irəlilədiyi anlamına gəlmir. Çünki “Qəbələ”dən Bilellə Tettehin, “Kəpəz”dən Papunaşvili ilə Xvalkonun zərbələri qeyri-dəqiq oldu. Geridə qalan dəqiqələrdə gəncəlilərin daha üstün, əzmkar və inamlı çıxış etdiyini söyləməkdə fayda var. Elmar Baxşıyevin komandası isə sanki gün ərzində ikinci 90 dəqiqəlik matçda oynayırmış kimi görünürdü.
Çoxu fasilədən sonra ev sahibləri üçün durumun yaxşıya doğru gedəcəyini proqnozlaşdıra bilərdi. Hər halda, “Qəbələ” qonaqlara nisbətən daha şanslı olmalıydı. Amma ikinci hissənin ilk dəqiqələri “qırmızı-qaralar”ın ümidlərini “dəfn etdi”. Səbəbkar isə Emil Səfərov oldu. O, Papunaşviliyə qarşı kobud oynadığından ikinci sarı vərəqəsini alıb meydandan qovuldu. Beləliklə, meydan sahibləri azlıqda qaldı. Onsuz da yaxşı oynamayan “qırmızı-qaralar”ın çıxışında bundan sonra azca dəyişiklik baş verdi. Növbəti 20 dəqiqədə maraqlı mübarizənin şahidi olduq. “Qəbələ” rəqibə təzyiq edə bilməsə də, əks-hücumlardan faydalanmağa çalışır, təhlükəli epizodlardan üzüağ çıxırdı. Ancaq komanda yaxşı təşkilatlanmadığından rəqabəti sona qədər görmədik. Niane - Papunaşvili tandemi asanlıqla rəqib müdafiəsini yarırdı.

Qonaqlar belə epizodların birində məqsədinə çatdı. Belə ki, Niane 70-ci dəqiqədə müdafiəçilərin arasından sıyrıldı və Papunaşvilin ötürməsinə yiyələndi. Rəşadın dərhal irəli atılıb onu zərərsizləşdirmək istəyi də alınmadı. Fərq ikiyə çatdı. Çox keçmədən yekun nəticəni müəyyənləşdirən qol da qeydə alındı. Cəmi 2 dəqiqə sonra Kvirkviyanın özünü topla birgə qapı önünə çatdırdığını gördük. Onu Papunaşvili və Niane müşayiət edirdi. Futbolçunun işini çətinə salmadan verdiyi ötürmədən birinci faydalandı. Beləliklə, Georgi hər üç qolda pay sahibi oldu. Bundan sonra Martins və Niane fərqlənmək şansını boşa verdisə, “Qəbələ” heç nə ilə yadda qalmadı. Nəticədə Adil Şükürovun komandası Elmar Baxşıyevin yetirmələrini sonuncu pilləyə göndərdi.

KƏNAN BAHADIR