Türkiyə Futbol Federasiyasının nəzdində fəaliyyət göstərən Nizam-İntizam Komitəsi (NİK) “Ankaragücü”nə və bu klubun prezidenti Faruk Kocaya verilən cəzaları açıqlayıb.

“Football-plus.az” xəbər verir ki, bu məsələ ilə bağlı qərarı bütün Türkiyə futbol ictimaiyyəti səbirsizliklə gözləyirdi. Ötən sayımızda da xəbər verdiyimiz kimi, bazar ertəsi 15-ci turun “Ankaragücü” – “Çaykur Rizəspor” matçının ardından böyük bir qalmaqal yaşanmışdı. Xəlil Umut Melerin idarəçiliyindən narazı qalan ankaralıların prezidenti Faruk Koca final fitindən dərhal sonra meydana daxil olaraq hakimin üzünə yumruq zərbəsi endirmişdi. Onun ətrafındakılar isə yerə yıxılan Meleri təpikləmişdi. Nəinki Türkiyədə, hətta Avropada da böyük əks-səda doğuran bu hadisədən bir gün sonra Faruk Koca müvəqqəti təcridxanaya yerləşdirildi və daha sonra yazılı açıqlama ilə üzr istəyərək istefa verməli oldu. 59 yaşlı Koca üzvü olduğu Ədalət və İnkişaf Partiyasından da kənarlaşdırıldı. Türkiyə mətbuatının yazdığına inansaq, Ankara prokurorluğu Kocaya dövlət məmuru statusunda olan şəxsə fiziki xəsarət yetirdiyi üçün 10 il, təhdidə görə 2 il, 6222 saylı qanuna görə isə 1 il olmaqla 13 illik həbs cəzasının verilməsini tələb edib. NİK-in qərarı da, gözlənildiyi kimi, çox sərt olub. “Ankaragücü”nün özünə 5 oyunluq cəza verilib. Paytaxt təmsilçisi öz meydanında ardıcıl 5 rəsmi oyunu azarkeşsiz keçirməli olacaq. Bundan başqa, kluba 2,2 milyon lirə para cəzası da verilib. Faruk Koca isə 5 illik müddətə vəzifəsini icra etməkdən məhrum olunub. Federasiyanın qaydalarına əsasən 3 ildən yuxarı hər hansı bir cəza alan şəxsin cəzası daimi olur. Bu da o deməkdi ki, Koca ömürlük futbol sahəsindən kənarlaşdırılıb! “Ankaragücü”nün yönəticilərindən Gülsən Yılmaz və Cengiz Gökaya xəbərdarlıq edilib. Cahit Şahin 75 günlük, Yusuf Buğra Tanık 45 günlük işindən kənarlaşdırılıb. Xəlil Umut Meler yerə yıxılandan sonra ona təpiklə zərbə vuran Şahin Yunus və Kənan Çelikkaya da ömürlük futboldan uzaqlaşdırılıb. Maraqlıdı ki, bu şəxslərin klubda hansı vəzifəni icra etdiyi bilinmir. Bu cəzalarla razılaşmayan “Ankaragücü” qərardan apellyasiya verəcək. Bunu klubun mətbuat katibi Hüseyn Aytəkin açıqlayıb.

Xəlil Umut Melere gəlincə, FİFA referisinin səhhəti ilə bağlı problem yoxdu. Almacıq sümüyündə kiçik çat yaranan Meler srağagün “Acıbadem” xəstəxanasından evə buraxıldı. O, xəstəxanadan birbaşa doğma məmləkətinə - İzmirin Səçuk kəndinə yollandı. Burda onu qohum-əqrəba və hakim dostları gül-çiçəklə qarşıladılar. Atasını qucaqlayan Meler duyğusal anlar yaşadı. O, jurnalistlərin karyerasını bitirib-bitirməyəcəyi barədə sualına cavab verməkdən boyun qaçırdı. Bu arada Türkiyə mətbuatının yazdığına inansaq, “Fənərbaxça” və Klublar Birliyinin başqanı Əli Koç daha 7-8 klubun prezidenti ilə birlikdə İzmirə yollanmaq qərarına gəlib. Onlar xüsusi təyyarı ilə Melerin evinə yollanaraq onu ziyarət edəcəklər.