“Qartal” daha bir ingiltərəli oyunçunu heyətinə qatdı
Superliqanın son turunda ''Ankaragücü'' – ''Beşiktaş'' matçının (2:3) final fitindən sonra yaşanan qalmaqal gündəmi zəbt etməkdədi.
Xatırladaq ki, oyun bitəndən sonra yerli fanatlardan biri meydana çıxaraq qonaq oyunçulara xəsarət yetirməyə çalışmışdı. Bu sırada komanda yoldaşlarını qorumağa çalışan Jozef de Souza isə həmin azarkeşin boynundan tutub kənara çəkdiyi üçün qırmızı vərəqə almışdı. Hakimin bu qərarı ''Beşiktaş'' camiəsində birmənalı qarşılanmamışdı. Nizam-intizam Komitəsinə sövq edilən ''sambaçı''nın hansı cəzanı alacağı maraq doğurur. Bu arada ''Ankaragücü''nün prezidenti Faruk Koca baş verən qalmaqala görə ''Beşiktaş''dan üzr istəyərək bunları deyib:
''Ev sahibi olduğumuz üçün bu hadisəyə görə məsuliyyət bizim üzərimizdədi. Bir azarkeşin 4-5 metr yüksəklikdən tullanıb meydana daxil olmasını və rəqib oyunçulara təpik atmasını qəbul edə bilmərəm. Həmin azarkeş bu hərəkəti ilə ən çox bizə və camiəmizə ziyan vurdu. Bu düşüncəsiz addımı ilə bütün fanatlarımızı töhmət altına saldı. Həm matçdan öncə, həm də final fitindən sora yaşananlara görə ''Beşiktaş'' camiəsindən üzr istəyirəm. Üzr istəmək də böyüklük nümunəsidi. Bu hadisənin bizdə son dərəcə narahatlıq doğurduğunu vurğulamaq istəyirəm. Ən qısa müddətdə ''Beşiktaş''ın azarkeş qruplarını ziyarət edib onlarla da söhbət edəcəm. Ümid edirəm ki, həmkarım Ahmet Nur Çəbi də Ankaraya gələndə belə addım atacaq''.
''Beşiktaş''la bağlı bir transfer xəbərini də diqqətinizə çatdıraq. Mövsümə yaxşı başlayan və 5 turdan sonra 13 xalla vahid lider olan ''qara qartal'' növbəti transferini reallaşdırmaq üzrədi. Komandanın yeni üzvü dünən İstanbula gəlib. Söhbət Natan Redmonddan gedir. Həm 28 yaşlı futbolçunun özü, həm də onun müqavilə ilə məxsus olduğu ''Sauthempton''la anlaşma əldə edilib. Redmond qarşıdakı mövsümü icarə əsasında ''ağ-qaralar''ın heyətində keçirəcək. İngiltərəli vingerin illik qazancının 1,5 milyon avro olacağı gözlənilir.
Qeyd edək ki, Redmond indiyə qədər cəmi üç klubun şərəfini qoruyub. ''Birmingem''in yetirməsi olan təcrübəli futbolçu 2013-16-cı illərdə ''Norviç''də top qovub. 2016-dan bəri isə 13,5 milyon avroya transfer olunduğu ''Sauthempton''da çıxış edirdi. Klubu ilə 2023-cü ilə qədər müqaviləsi olan Redmond klub karyerası ərzində 232 rəsmi oyunda 52 qol, 27 məhsuldar ötürmə ilə fərqlənib. İngiltərə mətbuatının yazdığına inansaq, ''Fənərbaxça'' və ''Qalatasaray''dan da təklif alan Redmond üstünlüyü ''Beşiktaş''a verib. “Ağ-qaralar” bir müddət öncə digər ingiltərəli futbolçu Dele Allini də transfer etmişdilər.
