Bazar günü – sentyabrın 3-də Türkiyə çempionatının 4-cü turu çərçivəsində “Fənərbaxça” “Ankaragücü”nün qonağı olacaq.

Oyun Bakı vaxtı ilə saat 22.45-də başlayacaq. Bu arada oyunun keçiriləcəyi stadionla bağlı söz-söhbət yaranıb. Məsələ burasındadı ki, paytaxt təmsilçisinin ev oyunlarını keçirdiyi “Eryaman” stadionunun ot örtüyü ilə bağlı problem var. Bu üzdən ankaralılar 2-ci tur çərçivəsində “Adana Dəmirspor”la ev oyununu (1:1) bu arenada yox, İstanbulda yerləşən “Atatürk Olimpiya”da keçirmişdi. Amma “Ankaragücü” cəbhəsi iddia edir ki, “Eryaman”da ot örtüyü ilə bağlı problem aradan qaldırılıb. Bu üzdən komanda İstanbul nəhəngini doğma meydanında qəbul etmək istəyir. Federasiya rəsmiləri də ot örtüyünü incələdikdən sonra buranın superliqa matçı keçirmək üçün əlverişli olduğu qənaətinə gəliblər. Buna baxmayaraq, “Fənərbaxça” bu qərarla razılaşmır. “Fənər” cəbhəsi hələ də ot örtüyünün bərbad olduğunu iddia edir və oyunun başqa stadionda keçirilməsini istəyir. İstanbulluların rəsmi müracitəindən sonra federasiya yenidən “Eryaman”ın incələnməsi üçün ora nümayəndələrini göndərib. Böyük ehtimalla TFF-nin qərarı qüvvədə qalacaq. Məlum olub ki, bu mövzu ilə bağlı “Fənərbaxça” prezidenti Əli Koç “Ankaragücü” başqanı Faruk Kocaya zəng vuraraq onunla telefonda söhbət edib. Koca həmin telefon danışığı zamanı Koça stadionlarında heç bir porblem olmadığını deyib. Paytaxt təmsilçisinin başqanı bu sözləri Türkiyə mətbuatına da təsdiqləyib: “Bizim stadionda ot örtüyü ilə bağlı problem yoxdu. Oyun “Eryaman”da keçiriləcək”.