Union – Real 2:3 (1:0)
Union (Berlin, Almaniya): Rönnov, Yuranoviç (Trimmel, 82), Yekkel (Bekker, 73), Knoxe, Leyte, Russiyon, Haberer, Xedira (Kral, 75), Qosens (Layduni, 75), Folland (Aaronson, 82), Berens.
Real (Madrid, İspaniya): Arrisabalaqa, Vaskes, Naço, Alaba (Rüdiger, 71), F.Qarsiya, Modriç, Valverde (Kroos, 46), Sebalyos (Pas, 90), Bellingem, Rodriqo (Dias, 80), Xoselu.
Qollar: Folland, 45+1 (1:0). Xoselu, 61 (1:1). Xoselu, 72 (1:2). Kral, 85 (2:2). Sebalyos, 89 (2:3).
Modriç 45-ci dəqiqədə penaltidən yararlana bilməyib (qapıçı).
Vərəqələr: Xedira, 35. Bellingem, 35. Alaba, 55. Layduni, 76 – sarı.
Hakim: Rade Obrenoviç (Sloveniya)
12 dekabr. Berlin. 73420 tamaşaçı.
oyunun statistikası
7 (5) qapıya (“çərçivə”yə) zərbə 23 (9)
3 künc zərbəsi 8
1 ofsayd 0
10 qayda pozuntusu 5
2 (0) sarı (qırmızı) vərəqə 2 (0)
29 topa sahibolma (faizlə) 71

"Football-plus.az" xəbər verir ki, oyun Madrid nəhəngi üçün prinsipial əhəmiyyət daşımadığından, Ançelotti, gözlənildiyi kimi, heyətdə müəyyən rotasiyaya əl atmışdı. Böyük üstünlüyə malik olmasına rəğmən, fürsətləri boşa verən “Real” fasilə ərəfəsinə bir komandanın başına gələcək biləcək ən böyük şanssızlığı yaşadı. Əvvəlcə qapıçı Rönnov Modriçin penalti zərbəsini ayağı ilə dəf etdi. Cavab hücumundaca Follanda “Union”u hesabda önə keçirməklə 70 mindən artıq azarkeşi ayağa qaldırdı! Amma belə vəziyyətlərdən çıxmağı bacardığını dəfələrlə göstərən “Kral klubu” ikinci hissədə vəziyyəti öz xeyrinə dəyişməyi bacardı. Hissənin ortalarında heç də həmişə start heyətində oynamayan Xoselu 11 dəqiqə aralığında başla iki qol vuraraq qəhrəmana çevrildi. Qrupun digər matçında “Braqa” məğlub durumda olduğu üçün “Union” həvəsdən düşmədi. Berlinlilər qələbə təqdirində 3-cü yeri tutacaqdılar. 85-ci dəqiqədə Kral gözlənilmədən hesabı bərabərləşdirdi. Maraqlıdı ki, Çexiya yığmasının üzvü buna qədər klub karyerasında son qolu 2019-un martında vurmuşdu. “Union” möcüzəyə inanaraq irəli atılsa da, son sözü yenə də “Real” söylədi. Son dəqiqədə Sebalyos yerlə uzaq küncü dəqiq nişan alaraq “Olimpiyaştadion”u şoka saldı. Ançelotti “Real”ın başında ÇL-də 56-cı oyunda 42-ci qələbəyə sevindi. Bununla da italiyalı mütəxəssis klub tarixində bu turnirdə ən çox qələbə qazanan baş məşqçi oldu. Əvvəlki rekord 71 oyunda 41 qələbə qazanan Migel Munyosa məxsus idi. Onu da bildirək ki, “Real” 2014/15-dən bəri ilk dəfə ÇL-in qrupunu maksimum nəticə ilə başa vurdu.

Napoli – Braqa 2:0 (2:0)
Napoli (Neapol, İtaliya): Meret, Di Lorentso, Rrahmani, Jezus (Esteqor, 73), Natan, Zambo Angissa, Zelinski (Kayuste, 60), Lobotka (Qaetano, 69), Politano (Elmas, 60), Kvaratsxeliya, Osimhen (Raspadori, 60).
Braqa (Portuqaliya): Mateus, Qomes (Mendes, 81), Fonte, Sərdar Saatçı, Borxa, Salasar (Əl Musrati, 69), Moutinyo (A.Orta, 81), R.Orta (Lopes, 88), Bruma, Pitsi (Ruis, 46), Banza.
Qollar: Sərdar Saatçı, 9-öz qapısına (1:0). Osimhen, 33 (2:0).
Vərəqələr: Banza, 19. Mendes, 83 – sarı.
Hakim: Slavko Vinçiç (Sloveniya).
12 dekabr. Neapol. 37841 tamaşaçı.
oyunun statistikası
9 (6) qapıya (“çərçivə”yə) zərbə 19 (5)
5 künc zərbəsi 6
2 ofsayd 1
12 qayda pozuntusu 13
0 (0) sarı (qırmızı) vərəqə 2 (0)
51 topa sahibolma (faizlə) 49

Bu oyunda böyük intriqa var idi. “Braqa” qalib gələcəyi təqdirdə tarixində ilk dəfə ÇL-in pley-offuna vəsiqə qazana bilərdi. Amma İtaliya çempionu rəqibə göz açmağa imkan vermədi. “Napoli” mövsümü o qədər də inamlı keçirməsə də, konkret bu matça çox yaxşı kökləndi. Türkiyəli müdafiəçi Sərdar Saatçının erkən avtoqolu qonaqları çətin duruma saldı. Fasiləyə qədər Neapol təmsilçisi daha bir qol vurmağa müvəffəq oldu. Osimhen 2023-cü ildə bütün turnirləri nəzərə almaqla 28-ci qolunu vurdu. O, bu göstəricidə A seriyasında top qovanlar arasında yalnız Lautaro Martinesdən geri qalır. Bəlkə də “Braqa” fərqi azaltsaydı, matçın sonluğu daha maraqlı və intriqalı alınardı. Amma Meret sona qədər də qapısını toxulmaz saxladı. Beləliklə, “Napoli” ardıcıl 3-cü dəfə ÇL-in qrup mərhələsi səddini aşaraq pley-offda oynamaq imkanı qazandı. Komanda 2019/20 və 2022/23-də də bu uğura nail olmuşdu. “Braqa” isə “Real”ın da köməyi ilə qrupu 3-cü pillədə tamamladı və çıxışını AL-də davam etdirəcək.

1. Real 6 6 0 0 16-7 18
2. Napoli 6 3 1 2 10-9 10
3. Braqa 6 1 1 4 6-12 4
4. Union 6 0 2 4 6-10 2

Oyundan sonra...
Karlo Ançelotti, “Real”ın baş məşqçisi: “Çox qəribə bir oyun izlədik. İlk 40 dəqiqə ərzində oyuna tam nəzarət edirdik. Sonra 2 dəqiqə ərzində hər şey 180 dərəcə dəyişdi və işimiz çətinləşdi. İkinci hissədə daha effektli oynamağa çalışdıq. Cinah asmalarına yönəldik. Çünki irəlidə başla yaxşı oynaya bilən futbolçumuz var. Xoselu ümidlərimizi doğruldaraq 2 qol vurdu. Bizim üçün vacib futbolçu olduğunu göstərdi. Belə sıx müdafiə olunan rəqiblərlə görüşlərdə onun özəllikləri işimizə yarayır. Sebalyos da bu qolu vurmağa layiq idi. Son vaxtlar işləri yaxşı getmirdi və çətin sınaqlardan keçməli oldu. Bellingem çox lazımsız sarı vərəqə aldı. Valverde son vaxtlar çox yükləndiyi üçün onu fasilədə əvəzlədim”.

Nenad Byelitsa, “Union”un baş məşqçisi: “Rəqib bizi çox hərəkət etməyə, topsuz qaçmağa vadar etdi. Amma öz oyunumuzla səviyyə baxımından onlardan çox da geri qalmadığımızı göstərdik. Son anlarda qələbə bizə də qismət ola bilərdi. Amma 3-cü qolu onlar vurdu. Artıq bütün diqqətimizi bundesliqaya yönəldəcəyik. Ümid edirəm ki, “Real”a qarşı sərgilədyimiz futbol bizi psixoloji cəhətdən ruhlandıracaq”.

Valter Matsarri, “Napoli”nin baş məşqçisi: “Qol buraxmamaq bizim üçün çox vacib idi. Çünki qol buraxsaq, işimiz çətinləşəcəkdi. Əvvəlki oyunlarda məhz müdafiədə etibarlı təsir bağışlamamışdıq. Bu dəfə isə daha balanslaşdırılmış futbol sərgilədik. Komandamın çıxışından razı qaldım”.

Artur Jorje, “Braqa”nın baş məşqçisi: “Bəlkə də sözlərim təəccüblü görünəcək. Çünki məğlub olduq. Amma bu qrupda növbəti yaxşı oyunumuzu keçirdik. Sadəcə, qol fürsətlərindən daha yaxşı yararlanan komanda qalib gəldi. “Napoli” əlinə düşən şanslardan çox effektli şəkildə fayadalandı. İkinci hissədə taktikanı dəyişərək iki hücumçu ilə oynamağa başladıq. Amma “Napoli” İtaliya futbolunu yaxşı təmsil edərək müdafiədə çox etibarlı təsir bağışladı”.