C qrupu
Real – Union 1:0 (0:0)
Real (Madrid, İspaniya): Arrisabalaqa, Vaskes, Rüdiger, Naço (Fran Qarsiya, 73), Alaba, Modriç (Dias, 80), Çuameni (Valverde, 66), Kamavinqa (Kroos, 65), Bellingem, Xoselu, Rodriqo.
Union (Berlin, Almaniya): Rönnov, Duxi, Bonuççi (Yekkel, 80), Leyte, Kral, Yuranoviç, Layduni (Aaronson, 66), Tuzar (Kemleyn, 83), Qosens, Bekker (Fofana, 80), Berens (Folland, 66).
Qol: Bellingem, 90+4.
Vərəqələr: Tuzar, 1. Çuameni, 37 – sarı.
Hakim: Espen Eskos (Norveç)
20 sentyabr. Madrid. 65207 tamaşaçı.

Madrid nəhəngi meydana heç də ideal heyətlə çıxmamışdı. Buna baxmayaraq “Real”ın hətta bu heyətlə də ÇL-in debütantına qarşı oyunda problem yaşayacağı gözlənilmirdi. Amma belə olmadı. “Kral klubu” xüsusilə ilk yarıda çox passiv nəzərə çarpdı. Böyük üstünlüyə rəğmən, komanda “çərçivə”yə cəmi 1 zərbə endirə bildi! Bütün komanda ilə müdafiə olunan Berlin təmsilçisi müdafiədə boşluq vermirdi. İlk yarının gedişində “Bernabeu”nun tribunalarında hətta fit səsləri də eşidilirdi. Bu oyun “Real”ın yaydakı transfer siyasəti barədə növbəti dəfə düşünməyə vadar etdi. Bütün diqqətini Mbappeyə yönəldən madridlilərin B planı olmadı. Tək Xoselu gözlənilən effekti vermir. Bu da artıq komandanın oyununda özünü göstərməyə başlayıb. “Real”ın açıq-aşkar dünya səviyyəli bir “9 nömrə”yə ehiyacı var. 2-ci hissədə mənzərə dəyişmədi. Sadəcə, “Real” daha həvəsli oynayaraq tempi artırdı. Rodriqonun 51-ci dəqiqədə dirəyə tuş gələn zərbəsini saymasaq, “Real” uzun müddət rəqib qapısı önündə heç nə yarada bilmirdi. Ançelotti Kroos ilə Valverdeni döyüşə atsa da, Berlin “avtobusunu” yarmaq heç cür mümkün olmurdu. Hər şey sensasiyalı bərabərliyə doğru gedirdi. Amma Bellingemin bununla bağlı öz planları var idi. Əsas vaxta əlavə olunan 4-cü dəqiqədə Valverdenin qüvvətli zərbəsindən sonra top Follanda dəyərək qapıçını çaşdırdı. Özünü yetirən Bellingem topu boş qapıya göndərməklə növbəti dəfə “Real”ın qəhrəmanına çevrildi! Qısda müddət ərzində artıq superulduz səviyyəsinə yüksələn Bellingem XXI əsrdə Kriştiano Ronaldo, İsko və Asensiodan sonra “Real”ın heyətində həm La Liqa, həm də ÇL-də debüt oyununda qol vuran 4-cü futbolçu oldu.

oyunun statistikası
31 (7) qapıya (“çərçivə”yə) zərbə 3 (0)
16 künc zərbəsi 1
4 ofsayd 1
8 qayda pozuntusu 11
1 (0) sarı (qırmızı) vərəqə 1 (0)
72 topa sahibolma (faizlə) 58

Braqa – Napoli 1:2 (0:1)
Braqa (Portuqaliya): Mateus, Qomes, Fonte, Niakate, Borxa (Marin, 85), Əl Musrati, Karvalyo (Salasar, 67), Calo (Banza, 77), Orta, Bruma, Ruis (Pitsi, 85).
Napoli (Neapol, İtaliya): Meret, Di Lorentso, Rrəhmani (Estiqor, 13), Juan Jezus, Olivera, Lobotka, Zambo-Angissa, Zelinski (Natan, 90), Politano (Raspadori, 66), Kvaratsxeliya (Elmas, 66), Osimhen (Simeone, 90).
Qollar: Di Lorentso, 45+1 (0:1). Bruma, 84 (1:1). Niakate, 88-öz qapısına (1:2).
Vərəqələr: Zambo-Angissa, 19. Osimhen, 41. Calo, 44. Fonte, 55. Politano, 56. Borxa, 66. Raspadori, 79. Olivera, 86. J.Jezus, 90+3 – sarı.
Hakim: Sərdar Gözübüyük (Niderland).
20 sentyabr. Braqa. 18422 tamaşaçı.
oyunun statistikası
16 (2) qapıya (“çərçivə”yə) zərbə 18 (6)
11 künc zərbəsi 10
1 ofsayd 3
14 qayda pozuntusu 12
3 (0) sarı (qırmızı) vərəqə 6 (0)
53 topa sahibolma (faizlə) 47

11 illik fasilədən sonra ÇL-in qrup mərhələsinə qayıdan “Braqa” İtaliya çempionunu büdrətməyə yaxın idi. Neapollular ilk yarıda böyük üstünlüyə malik olsalar da, yalnız bir dəfə fərqlənə bildilər. Yeri gəlmişkən, sağ cinah müdafiəçisi Di Lorentso ötən mövsümü də nəzərə almaqla artıq ÇL-də 3 qol vurub. O, bu müddətdə bu turnirdə ən məhsuldar müdafiəçidi! “Braqa” 2-ci hissədə doğma fanatları önündə oynadığını xatırlayaraq hücum etməyə başladı. Bu hücumlardan biri 84-cü dəqiqədə Brumanın başla topu tora göndərməsi ilə nəticələndi. Amma meydan sahibləri bu nəticəni qoruya bilmədilər. Bir neçə dəqiqə sonra Zelinskinin ötürməsinin qarşısını kəsmək istəyən Niakate topu öz qapısına göndərdi. Bu epizoddan sonra çox üzgün görünən fransalı müdafiəçini yalnız komanda yoldaşları sakitləşdirə bildi. Beləliklə, bu qrupda favoritlər çətinliklə də olsa, ilk turu 3 xalla tamamladılar.

3 oktyabr: Napoli – Real, Union – Braqa.

Oyundan sonra...
Karlo Ançelotti, ''Real''ın baş məşqçisi: “Fasilədə heç də əsəbi deyildim. Oyunçularımla yüksək tonda danışmağa ehtiyac yox idi. Sadəcə, oyunumuzda çatışmayan bəzi detalları onlara xatırlatdım. İlk növbədə daha enerjili və coşqulu oynamalıydıq. “Union”un yorulduqca hər ötən dəqiqə öz qapısına doğru sıxışacağını bilirdik. Belə də oldu. İkinci hissədə hətta ən xırda detallara da ciddi yanaşmağa başladıq. Xüsusilə də “Union”un standart zərbələr zamanı təhlükəli olduğunu bilirdik. Belə məqamlarda çox diqqətli oynadıq. Xoselu oyunumuza yeniliklər qatıb. Onun sayəsində hava toplarında üstünlüyümüz artıb. Amma Vinisiusun yeri, təbii ki, görünür. O, dünyanın ən yaxşılarından biridi və meydanda fərq yaratmağı bacarır. Gələn həftədən etibarən bizimlə birlikdə olacaq”.

Urs Fişer, “Union”un baş məşqçisi: “Təbii ki, hamımız çox üzgünük. 1-2 dəqiqə də dözsəydik, “Santyaqo Bernabeu”dan xal aparacaqdıq. Buna baxmayaraq, komandamla fəxr edirəm. Madridlilər 2-ci hissədə bizə göz açmağa imkan vermədilər. Bəzi epizodlarda açıq-aşkar bəxtimiz gətirdi. Ona görə də “Real”ın layiqli qələbə qazandığını etiraf etməliyəm”.

Artur Jorje “Braqa”nın baş məşqçisi: “Səhvlərimizi gördük və onları düzəltməyə çalışacağıq. Ümumi götürəndə komandamdan razı qaldım. Oyunçularım tapşırıqlarımı yerinə yetirməyə çalışdılar. Fikrimcə, bu oyundan xalsız ayrılmağa layiq deyildik. Amma özümüzü günahlandıra bilmərik. Oyunu başıuca tərk edirik. “Braqa” xarakterə malik olduğunu göstərdi”.

Rudi Qarsiya, “Napoli”nin baş məşqçisi: “Qarşıya qoyulan əsas məqsədə çatdıq. İlk yarıda daha çox qol vurmalıydıq. Həm son zərbələrdəki qeyri-dəqiqlik, həm də rəqib qapıçının inamlı oyunu bizə mane oldu. İkinci hissədə “Braqa” hücumda fəallaşdı. Müdafiədə daha diqqətli olmaq məcburiyyətində qaldıq. 2-ci qolu vaxtında vurmalıydıq. Bunu etsəydik, sonluq bu qədər çətin olmazdı. ÇL-də səfər qələbəsi həmişə dəyərlidi. Özü də nəzərə alaq ki, biz ilk turda 3 xal qazanan yeganə İtaliya təmsilçisi olduq. Amma səhvlərimizin olduğunu da bilirik”.