Avqustun 10-da avrokubokların 2022/23 mövsümündə ilk qalib müəyyənləşdi: Finlandiyanın paytaxtı Helsinki şəhərində Avropa Superkuboku (AS) oyunu keçirildi.
Ümumilikdə 47-ci olan dueldə Çempionlar Liqası (ÇL) və Avropa Liqasının (AL) son qalibləri “Real” və “Ayntraxt” qarşılaşdı. Almaniya klubu bu yarışda debüt edərkən, İspaniya nəhəngi AS-də 8-ci dəfə oynadı.
Xatırladaq ki, “Real” bu avrokubokda keçirdiyi 7 oyundan 4-də qələbə qazanmışdı.
Olimpiya stadionunda baş tutan matçda sensasiya baş vermədi. Karlo Ançelottinin ilk mayın 28-də ÇL-in “Liverpul”la final oyunundakı start heyətinə üstünlük verməsi diqqətdən yayına bilməzdi. “Real” favorit statusunu inamlı oyunu və qələbəsi ilə doğrultdu. Ötən mövsümün son aylarında AL-də əsl kubok döyüşçüsü kimi yadda qalan “Ayntraxt” indi həmin komandanı xatırlatmır. Oliver Qlasnerin komandası bundesliqanın ilk turunda “Bavariya”ya evdə 1:6 hesabı ilə uduzmuşdu. “Real”ın frankfurtluları darmadağın etmək niyyəti yox idi. Ançelottinin komandası, sadəcə, öz oyununu oynayıb qalib gəldi. İlk hissənin sonuna yaxın künc zərbəsi zamanı topu Kazemirodan qəbul edən Alaba hesabı açdı. Oliver Qlasner 58-ci dəqiqədə iki yeni oyunçunu meydana buraxmaqla matçda dönüş yaratmaq istədi. Lakin “Real” ikinci hissədə də oyuna nəzarət etdi. Matçın ən yaxşı oyunçusu seçilən Kazemironun zərbəsindən sonra top tirə tuş gəldi. Çox keçmədən Vinisius ilə Benzema ikinci qolu təşkil etdi. Bundan sonra madridlilərin qələbəsinə böyük ölçüdə şübhə yeri qalmadı.
Real – Ayntraxt 2:0 (1:0)
Real (Madrid, İspaniya): Kurtua, Karvaxal (Rüdiger, 85), F.Mendi, Militao, Alaba, Kazemiro, Kroos (Çuameni, 85), Modriç (Rodriqo, 67), Valverde (Kamavinqa, 76), Vinisius (Sebalyos, 85), Benzema.
Ayntraxt (Frankfurt, Almaniya): Trapp, Knauff, Ture (Alario, 70), Tuta, Ndika, Lents, Sou, Rode (Götse, 58), Lindstrem (Kolo Muani, 58), Borre, Kamada.
Qollar: Alaba, 37 (1:0). Benzema, 65 (2:0).
Vərəqə: Alario, 90+2 - sarı.
Hakim: Maykl Oliver (İngiltərə).
10 avqust. Helsinki (Finlandiya). 31042 tamaşaçı.
Faktlar
* “Real” Avropa superkubokunu 5-ci dəfə qazandı. Madrid klubu bu göstəriciyə əsasən “Barselona” və “Milan”ın rekordunu təkrarladı. Qeyd edək ki, “Real”ın bütün uğurları XXI əsrə təsadüf edib.
* “Real” 2014-cü ildən sonra müxtəlif turnirlərdə keçirdiyi 19 həlledici oyundan 17-də qalib gəlib. Maraqlıdı ki, hər iki məğlubiyyət “Atletiko” ilə görüşdə qeydə alınıb. “Real” əzəli rəqibinə 2014-cü ildə İspaniya superkuboku, 2017-ci ildə isə Avropa superkuboku uğrunda matçda uduzub. “Kral klubu” son 8 ildə 5 dəfə ÇL-də, 4 dəfə Klublararası Dünya Çempionatında, 4 dəfə AS-də, 3 dəfə İspaniya Superkubokunda, 1 dəfə isə İspaniya kubokunda qalib olub.
* Ançelotti məşqçi kimi Avropa superkubokunu 4-cü dəfə qazandı. O, bu göstərici ilə Xosep Qvardiolanı arxada qoyaraq vahid rekordçu oldu. 63 yaşlı italiyalı mütəxəssisin komandalarından “Milan” 2003-cü ildə “Portu”nu 1:0, 2007-ci ildə “Sevilya”nı 3:1, “Real” isə 2014-cü ildə “Sevilya”nı 2:0 hesabı ilə məğlub edib.
* Ançelotti məşqçilik karyerasında “Real”la 8-ci, ümumilikdə isə 24-cü titulunu qazandı. O, “Milan”la 8, “Çelsi” və “Bavariya” ilə 3, “Yuventus” və PSJ ilə 1 turnirin qalibi olub.
* Alaba AS-də 184-cü qolun müəllifi oldu. O, bu turnirdə qol vuran ilk avstriyalıdı.
* Benzema “Real”ın formasında 324-cü qolunu vurdu. Fransalı hücumçu komandanın ən yaxşı bombardirlərinin siyahısında Raul Qonsalesi (323) arxada qoyaraq 2-ci yerə təklikdə sahib oldu. Madrid klubunda ən çox qol vuran Kriştiano Ronaldodu (450).
* Benzema “Real”la 23-cü titulunu qazanmaqla Fransisko Xentoya çatdı. Komandanın bu planda rekordçusu Marselodu (25).
* Vinisius bütün turnirlərdə Benzemaya 16-cı dəfə məhsuldar ötürmə verdi.
* Kurtua “Real”la ardıcıl 4-cü həlledici matçda top buraxmadı. Belçikalı qapıçı bu oyunlarda 19 seyv edib. O, İspaniya Superkubokunda 2020-ci və bu il, həmçinin ÇL-də “Liverpul”la mayda keçirilən son finalda qapısını toxunulmaz saxlayıb.