Dekabrın 7-də futzal üzrə yüksək liqada qış fasiləsi başladı.

"Football-plus.az" xəbər verir ki, komandalar 2-ci dövrənin 10-cu tur matçından sonra istirahətə yollandı. İndiyə qədər keçirilən oyunların maraqlı nəticələrlə yadda qaldığını bilirsiz. Cari mövsümdə yetərincə rəqabətli matçların şahidi olduq. Məsələnin üzücü tərəfi isə iddialı komandaların adının dəyişməməsidi. Yəni “Araz-Naxçıvan”, “Neftçi” İK və “Baku Fire”nin öndərliyi davam edir. Gözlənildiyi kimi, Muxtar Respublika təmsilçisi liderdi. Vitali Borisovun komandasının ən yaxın izləyicisi isə Hacıbala Abdullazadənin yetirmələridi. Hazırda onları bir-birindən cəmi 2 xal ayırır. Əslində “Baku Fire” da uğurlu start götürmüşdü. Lakin xüsusilə son turda yaşanan uğursuzluq kollektivi xeyli gerilətdi. Yenə də ilk pillələrlə bağlı əzmkar mübarizənin şahidi olmaqla təsəlli tapmaq mümkündü. Aşağı sıralarda isə debütant “Yasamal Bakı”, yenidən qurulan “Record club” və U-19 “əyləşib”. Bunlardan Yasamal təmsilçisi üçün müsbət fikirlər söyləmək olar. Çünki komanda yeni olmasına baxmayaraq, nəticələrə əsasən 4-cü pilləni “sığortalamış” görünür. “Record club” isə U-19-un performansından təsəlli almaqla məşğuldu. Çünki İlqar Aslanovun çalışdırdığı yeniyetmələr qələbə həsrətiylə yanıb-alışır. Təbii ki, bunlar bizim gördüklərimizdi. Bəs komandalar nəticələrlə bağlı nə düşünür? Görəsən, mövsümün əvvəlində qarşıya qoyulan hədəflər nə dərəcədə reallaşıb? Ümumiyyətlə, ilk 10 tur necə dəyərləndirilir? Bu suallarla baş məşqçilərə müraciət etdik. Təəssüf ki, “Record club”un baş məşqçisi Əli Sabahiylə əlaqə saxlamaq mümkün olmadı.

Vitali Borisov (Araz-Naxçıvan): “İstəyərdik ki, yüksək liqa daha səviyyəli keçsin. Güclü komandaların çox olması həm rəqabəti, həm də prinsipiallığı artırır. Məqsəd qış fasiləsinə lider kimi yollanmaq idi. Buna nail olduğumuz üçün uşaqlara minnətdaram. Bundan sonrakı oyunlara daha ciddi hazırlaşacağıq. Komandada islahatlar gözlənilir. Bir neçə futzalçını yola salıb yenilərini gətirəcəyik. Hədəf çempion olmaqdı”.
Teymur Eyvzaov (Baku Fire): “Ağır oyunlar keçirdik və çətin sınaqlardan çıxdıq. Bəzi oyunlarda istədiyimiz nəticələri qazana bilmədik. Buna aparıcı oyunçuların həmin matçlarda zədəli olması səbəb oldu. Güclü rəqabət 2-3 komanda arasındadı. Məncə, rəqiblərimizdən daha sabit və baxımlı oyun nümayiş etdiririk. Fevrala qədər vaxtımız var ki, gücümüzü daha da artırıb hədəflər uğrunda mübarizədə daha yaxşı olaq. Bunu bacaracağımıza inanırıq”.

Hacıbala Abdullazadə (Neftçi İK): “Ötən mövsümlərə nisbətən inkişaf hiss olunur. İndi matçlar daha rəqabətli keçir. Çempionluq üçün çıxış edən komandaların sırasında olmaq qürurvericidi. Kaş ki, belə kollektivlərin sayı daha çox olaydı... Bütün rəqiblərimizə uğurlar arzulayıram. Hazırda formamızın zirvəsindəyik. “Araz-Naxçıvan” kimi rəqibə qarşı layiqli oyun göstəririk. Nəticələr göz qabağındadı. İnşallah, fasilədən sonra daha yaxşı olacağıq. Sonda “Futbol+”ə futzalı işıqlandırdığı və diqqət mərkəzində saxladığı üçün təşəkkür edirəm”.

İlqar Aslanov (U-19): “Bilirsiz ki, yüksək liqanın ən təcrübəsiz komandasıyıq. Buna görə futzalçılarımın işi çətin olur. Onlar heyətində güclü legionerlər olan kollektivlərə qarşı oynayır. Daha əvvəl də demişdim ki, nəticə bizim üçün ikinci plandadı. Məqsəd uşaqların təcrübə qazanmasıdı. Şükür Allaha, bunu edə bilirik. Məğlub olduğumuz oyunlarda belə meydana çıxmamış oyunçulara şans verirəm. İstəyirəm ki, nəsə öyrənsinlər. Milli komandanın futzalçıları daha yaxşı olmalıdı. Düzdü, potensiallı uşaqlar çox deyil. Lakin inanıram ki, azı 3-4 oyunçum gələcəkdə “Araz-Naxçıvan”ın və əsas millinin üzvü ola biləcəklər. Məğlubiyyətlərə görə utanmıram. Təki, uşaqlar təcrübə qazansın, gələcəkdə futzalı yaşada bilsinlər”.

KƏNAN BAHADIR