"Neftçi" "Zirə" üzərindəki qələbənin davamını gətirmək istəyirdi.

Qeyri-sabit çıxış edən qonaqlar isə Bakıya ən azı uduzmamaq üçün gəlmişdi. Hakimin start fitindən sonra meydanda döyüş başladı. İlk dəqiqələrdən tovuzlular topa nəzarət edib irəli çıxmağa çalışsa da, 5-ci dəqiqədə Koffi sürətlə irəliləyib cərimə meydançasına daxil oldu və qapı xəttinə paralel Ozobiçə ötürmə verdi. Xorvatiyalı yüngül toxunuşla hesabı açdı. Amma "ağ-qaralar"ın sevinci uzun sürmədi. 9-cu dəqiqədə Serranonun cərimə zərbəsindən qapı önünə asmasına Hakman yüksəldi və topu Miller üçün endirdi. Sonuncu toru sirkələməkdə çətinlik çəkmədi. 14-cü dəqiqədə Rza ilə üzbəüz qalan Con hesabı qonaqların xeyrinə dəyişməyə borclu idi. Amma təkbətəki boşa verdi və yəqin oyundan sonra buna görə başına-gözünə döyür. İlk hissənin qalan vaxtında mübarizə əsasən meydanın mərkəzində getdi.

2-ci yarıya "ağ-qaralar" üstün başladı. İlk qolun müəllifi Ozobiç 56-cı dəqiqədə komandasının qələbəsi üçün növbəti fədakarlığı etdi. Xorvatiyalı çətin vəziyyətdə olsa da, Rəhmanı zərbə mövqeyinə çıxardı. Hacıyev qapıya elə zərbə vurdu ki, az qala tor cırılacaqdı. Maraqlıdı ki, qonaqlar bu qoldan sonra da ruhdan düşmədi. Cəmi 3 dəqiqə sonra Faiq uzun ötürmə ilə Conu gördü, o isə dəqiq zərbəylə hesaba tarazlıq gətirdi. Bərabərlikdən sonra meydan sahibləri yenidən irəli atıldı. Olanarenin zərbəsi təhlükəli olsa da, top toru yandan sirkələdi. Bir qədər sonra ofsayd qeydə alındı. Rəhmanın hücumundan da nəticə hasil olmadı. 73-cü dəqiqədə Lebondan ötürmə alan Olanare qol vursa da, referi VAR-dan təsdiq işarəsi gözlədi. Qolun qaydalar çərçivəsində vurulduğu bildirildi və "Neftçi" yenidən hesabda önə çıxdı. Tovuzlular 3-cü qol ümidi ilə irəli atıldı. 77-ci dəqiqədə Conun iti bucaq altından zərbəsinin qarşısını Rza aldı. Ayxan Abbasovun yetirmələri nə qədər irəli atılsalar da, meydan sahiblərinin müdafiəsini yara bilmədilər. Oyuna əlavə olunan dəqiqələrdə "Neftçi"nin fərqi artırmaq şansı olsa da, təcrübəli Kamal əvvəlcə Sayefin, ardından Olanarenin sevinməsinə imkan vermədi. Əliyar Ağayevin final fiti Adrian Mutunun komandasının qələbəsini rəsmləşdirdi. “Neftçi” bu qələbə sayəsində üç pillə irəlilədi.

Gözdən qaçmadı
* Stadiona 200-ə yaxın tovuzlu azarkeş gəlmişdi. Onlar "Ultras Turan" plakatı açmışdı. Fanatlar hələ oyun başlamadan "Abbasov Ayxan" şüarını səsləndirdi.
* Arenadakı monitorlar işləmirdi
* 34-cü dəqiqədə Melano zədələndi. Futbolçu nə qədər oynamaq istəsə də, sonda ağrılara dözə bilmədi və əvəzləndi.
* Matçda hakim "Neftçi"nin xeyrinə qərar verəndə qonaq azarkeşlər "Əliyar, "Neftçi"nin formasını gey!" şüarını səsləndirirdilər.

ABDULLA İSMAYILOĞLU