Xəbər verdiyimiz kimi, bazar günü keçirilən seçkidə Sərdar Adalıya qalib gələn Hasan Arat “Beşiktaş” tarixinin 35-ci prezidenti oldu.

Artıq camiədə yeni dönəm rəsmən başladı. Komanda faktiki sabiq əfsanələrinin əlinə keçib. Çünki Rza Çalımbay, bilindiyi kimi, baş məşqçi funksiyasını icra edir. Komandada iz buraxmış daha bir isim Feyyaz Uçar idarə heyətində yer alacaq və futbola cavabdeh yönətici vəzifəsini daşıyacaq. “Beşiktaş”da uzun illər futbolçu kimi top qovmaqla yanaşı, baş məşqçi kimi də çalışmış Samet Aybabaya isə baş əlaqələndirici vəzifəsi tapşırılıb. Srağagün Uçarla Aybaba Ümraniyədəki bazaya gedərək həm məşqçi korpusu, həm də futbolçular ilə görüşüb. Onlar sona qədər komandanın arxasında olacaqlarını və bütün lazımi dəstəyi verəcəklərini vurğulayıblar. Yeni rəhbərliyin gəlişi şənbəgünkü derbinin önəmini “Qartal” üçün bir qədər də artırıb. Dekabrın 9-da “Beşiktaş”ı doğma meydanda “Fənərbaxça” ilə çox prinsipial bir qarşılaşma gözləyir. Təbii ki, əzəli rəqib üzərində qələbə qazanmaqla işə başlamaq yeni rəhbərlik üçün əlavə bonus ola bilər. Elə turnir cədvəli baxımından da derbi “ağ-qaralar” üçün çempionluq mübarizəsindən qopmamaq mənasında son şansdı. Çünki məğlubiyyət təqdirində xal fərqi 14-ə yüksələcək...

Çalımbay dünənki səhər məşqindən öncə jurnalistlərlə bir araya gəlib. Zədəli oyunçuların durumu və qarşıdan gələn derbi haqda danışan təcrübəli mütəxəssis bunları deyib: “Birlik və bərabərlik içində gözəl işlər görəcəyik. Feyyaz Uçar və Samet Aybaba ilə bir araya gəlmək xoş oldu. Üzümüz güldü. Rozye, Raşitsa və Masuakunun durumu barədə həkimimizdən məlumat gözləyirəm. Onların, eləcə də Bayi, Onana və Gezzalın derbidə oynayıb-oynamayacağına önümüzdəki günlərdə qərar verəcəyik. Derbi ərəfəsində durumumuz qaydasındadı. Camiə üçün çox önəmli bir matça çıxacağıq. Futbolçular da bunun fərqindədi. Yuxarı pillələrdən qopmamaq üçün mütləq qalib gəlməliyik. Fanatlarımızın dəstəyinə güvənirik. Zədəlilərimiz var, amma bu, bəhanə ola bilməz. Derbi bizim üçün mövsümün dönüş anı olmalıdı. Cümə günü son məşqi fanatlarımız üçün açıq etmək istəyirik. Bu işlərlə Feyyaz Uçar maraqlanır. Çalışacağıq ki, son məşqdə fanatlarımız da, jurnalistlər də iştirak etsin. Başqan Hasan Arat cümə günü gələcək və komanda ilə tanış olacaq. Hələ ki görüşə bilməmişik. Hazırda xaricdədi. Bəlkə də transferi həll etməyə gedib. Ola bilər ki, şəxsi işləri var. Bunu Feyyaz Uçardan soruşun”.
Yeri gəlmişkən, bu mövsüm prinsipial matçlara qonaq fanatların buraxılması ənənəsi budəfəki derbidə də davam edəcək. İstanbul valiliyindən verilən açıqlamaya görə, İdman Təhlükəsizlik Komitəsinin qərarı ilə “Türpaş Stadionu”na “Fənərbaxça” fanatları da buraxılacaq. Konkret desək, “Fənər”in 1814 azarkeşi qonaqlar üçün ayrılmış tribunada yerini tutacaq.

Qeyd edək ki, oktyabrın 21-də “Rams Park”da keçirilən “Qalatasaray” – “Beşiktaş” derbisinə də qonaq fanatlar buraxılmışdı.