“Beşiktaş”da növbədənkənar prezident seçkisinin tarixi, nəhayət, rəsmən bəlli olub.

"Football-plus.az"-ın məlumatına görə, seçki dekabrın 10-da keçiriləcək, həmin gün yetərsay qeydə alınmayacağı təqdirdə bir həftə sonra, yəni dekabrın 17-də baş tutacaq. Məlum olduğu kimi, oktyabrın 5-də Konfrans Liqasının qrup mərhələsi çərçivəsində evdə İsveçrə təmsilçisi “Luqano” ilə oyunda qeydə alınan şok məğlubiyyətdən sonra komandada radikal dəyişikliklər baş verdi və baş məşqçi Şenol Günəşlə yollar ayrıldı. Seçkiyə qədər bu vəzifəni Günəşin köməkçisi Burak Yılmaz icra edəcək. Eləcə də başqan Ahmet Nur Çəbi böyük təzyiqdən sonra istefa verərək növbədənkənar seçkinin olacağını açıqladı.

İndi camiəni maraqlandıran əsas sual namizədlərin kimliyidi. Seçkiyə iki aydan da az qalıb və hələ ki, yalnız bir nəfər – Hasan Arat namizədliyini rəsmən açıqlayıb. Daşınmaz əmlak sahəsində çalışan, İstanbulda və Londonda şirkətləri olan Arat daha öncə 1977-81-ci illərdə “Beşiktaş”ın basketbol komandasının şərəfini qoruyub, eləcə də 1998-2000-ci illərdə klubda vitse-prezident kimi çalışıb. Camiədə yetərincə sevilən şəxslərdən olan Arat srağagün layihələrini və planlarını açıqlayıb. O, ilk növbədə komandaya idman direktoru, eləcə də Türkiyənin ən güclü skautlarını cəlb edəcəyini, qış transfer dönəmində iki ulduz futbolçu alınacağını, camiəni yaxından tanıyan bir şəxsi baş məşqçi postuna gətirəcəyini bildirib. Bundan başqa, Arat sponsorluq gəlirlərini də artırmaq niyyətindədi və artıq bir şirkətlə ilkin razılıq əldə edib. Arat “Beşiktaş”ın basketbol və voleybol komandalarını da gücləndirməyə söz verib.

Digər namizədlərin durumu isə daha çox Ahmet Nur Çəbidən asılıdı. Məsələn, hazırda klubun idarə heyətinin sədri olan Tevfik Yamantürklə vitse-prezident Əmrə Kocadağ başqanlığa namizəd olmaq haqda ciddi düşünür. Amma onlar Çəbiyə rəqib olmaq istəmir. Yamantürk Çəbinin qərarını gözlədiyini və yekun qərarı uzağı noyabrın 7-də verəcəyini qeyd edib. Çəbi isə nə edəcəyini hələ də bilmir. Ailəsi və yaxınları ona klubdan ayrılmağı, dincəlməyi məsləhət görür. Amma camiədə hələ də onu dəstəkləyənlər az deyil. 2019-cu ildən başqa vəzifəsini icra edən 64 yaşlı Çəbi bir qədər də gözləmək niyyətindədi. O, nəticələrin necə olacağını görmək istəyir. Dekabrın 9-da “Fənərbaxça” ilə derbi var. Bu müddətdə nəticələr yaxşılaşacağı, tribunadakı etiraz dalğası azalacağı və üstəlik derbidə qələbə əldə olunacağı təqdirdə Çəbi yenidən namizədliyini irəli sürəcək. Amma indi onu düşündürən daha bir önəmli məqam dekabrın 3-də baş tutacaq maliyyə toplantısıdı. Orda Çəbinin 2-ci dönəmi, yəni ötən ilin mayından bəri olan fəaliyyəti səsverməyə çıxarılacaq. Maddi və idarəetmə baxımından fəaliyyəti qənaətbəxş sayılmasa, Çəbi də özündən əvvəlki başqan Fikrət Orman kimi məhkəmələrdə “sürünməli” olacaq.