Misli premyer-liqasının 15-ci turu da sarı və qırmızı vərəqələrin sayı baxımından səliqəli alındı.

"Football-plus.az" xəbər verir ki, 5 oyunda futbolçulara ümumilikdə 20 sarı vərəqə göstərildi, heç kim meydandan qovulmadı. “Zirə” “Neftçi”yə uduzsa da, Rəşad Sadıqov jurnalistlər önündə bu mövsüm hakimliyin səviyyəsinin yüksəldiyini dedi. Maraqlıdı ki, Tovuzda “Kəpəz”i iki cavabsız qolla məğlub edən “Sabah”ın baş məşqçisi Murad Musayev nəinki Rauf Cabbarovun idarəçiliyini, ümumilikdə Azərbaycan hakimliyini “bombaladı”, hələ sözarası “CBC Sport”u da qərəzli münasibətdə suçladı.

Araz-Naxçıvan – Səbail, RƏVAN HƏMZƏZADƏ
Oyun qarşılıqlı hücumlar şəraitində keçdi. Ümumilikdə idarəçiliklə bağlı narazılıq olmadı. 55-ci dəqiqədə “Araz-Naxçıvan”ın futbolçuları penalti istəsə də, hakim haqlı olaraq buna aldanmadı. Videotəkrarda Orxan Əliyevdən çıxan topun Bardeanın üzünə dəydiyi göründü. 5 dəqiqə sonra forvardın qapıçı ilə üz-üzə qaldığı epizodda qonaqlar oyundankənar vəziyyət gözlədi. Lakin referi doğru qərar verərək oyunu davam etdirdi. 69-cu dəqiqədə Yusif Nəbiyev cərimə meydançasında yerdə qalaraq penalti tələb etdi. Lakin Həmzəzadə düzgün mövqe seçimi ilə epizodu görürdü. Burda penaltidən söhbət gedə bilməzdi. Baş hakim görüşü ideal səviyyədə idarə etdi, nəticəyə təsir edən hansısa ciddi səhvə yol vermədi.

Neftçi – Zirə, İNQİLAB MƏMMƏDOV
Oyunda mübahisəyə açıq epizodlar oldu. 9-cu dəqiqədə rəqib futbolçu Rüstəm Əhmədzadənin ayağını tapdaladı. Amma bu məqam İnqilab Məmmədovun gözündən qaçdı. 23-cü dəqiqədə Kulaça qarşı sərt davranılsa da, hakimin gözündən yayındı. 29-cu dəqiqədə İsmayıl İbrahimlinin cərimə meydançasına asması zamanı topa yüksələn Kulaç qapıçıyla toqquşdu və yerdə qaldı. Lakin referi qayda pozuntusunun olmadığı dedi. 40-cı dəqiqədə Şinyaşiki hücuma çıxarkən Renato onunla çiyin-çiyinə mübarizəyə qoşuldu. Sonda vinger yerdə qaldı. Hakim bunu qayda pozuntusu kimi qiymətləndirərək braziliyalıya sarı göstərdi. Bu cəza zirəli futbolçuların etirazına səbəb oldu. Qalan müddət ərzində İnqilab Məmmədovun mühakimə ediləsi qərarı olmadı. Referi 90 dəqiqə ərzində iki dəfə əlini cibinə saldı. Adətən, idarəçiliklə bağlı məqamlara həssas münasibət göstərən Rəşad Sadıqov da Məmmədovdan narazı qalmadı.

Turan Tovuz – Sumqayıt, ELÇİN MƏSİYEV
Maraqla gözlənilən matçda ədaləti təmsil etmək FİFA referisinin öhdəsində idi. Tovuz azarkeşlərinin təzyiqini və komandalarına münasibətdə haqsızlığa adekvat cavab verdiyini nəzərə alsaq, Məsiyev işinə tam məsuliyyətlə yanaşmalıydı. Onun bunu bacarmadığını deyə bilmərik. Çünki hakim əsasən hadisələrə operativ müdaxiləsi və düzgün qərarları ilə seçildi. Lakin, bir epizodda səhvə yol verdiyinə şübhə yoxdu. Belə ki, Paçu qol vurmağa yaxın idi. Amma Elvin rəqib futbolçunun yaxasından yapışdı və buraxmadı. Epizodun sonunda "Turan Tovuz"un futbolçusu yerdə qaldı. Elçin Məsiyev burda Elvini meydandan qova, hətta "Sumqayıt"ın qapısına penalti təyin edə bilərdi. Ümumilikdə hakimin idarəçiliyini qənaətbəxş saymaq olar. Hər halda, nə Ayxan Abbasov, nə də Mübariz Orucov bu yöndə narazılıq etdi. Əlbəttə, Məsiyevin oyunboyu və bitəndən sonra lazımi müdaxilələr etməsi, baş verə biləcək gərginliyin səbəbkarlarını dərhal "sarı" ilə cəzalandırması qeyd olunmalıdı.

Kəpəz – Sabah, RAUF CABBAROV
Gəncəlilər autsayder mövqeyindən qurtulmaq istəyirsə, masazırlılar qış fasiləsinə qədər ilk "5-lik"də yer almaq niyyətindədi. Bu baxımdan matçın səhvsiz idarə olunması hər iki tərəf üçün vacib idi. Adil Şükürov ədalət təmsilçisindən şikayətçi olmasa da, Murad Musayev Cabbarovu "ağ yudu, qara sərdi". Əslində ciddi narazılığa ehtiyac yox idi. Çünki Cabbarovun nəticəyə təsir edəcək səhvindən söhbət gedə bilməz. Bəzi hallarda səbrsiz davrandığını demək isə yanlış olmaz. Buna baxmayaraq, referi normal idarəçiliklə yadda qaldı - həm baş məşqçiyə, həm də futbolçulara ədalətli cəza verdi. Bu başqa məsələ ki, Azərbaycan hakimliyi dünya standartlarından bir qədər geri qalır. Hakimlərimiz yerli-yersiz fitlərlə həm futbolçuları, həm də azarkeşləri bezdirir, bir çox hallarda futbolun təmas, mübarizə oyunu olduğunu unudurlar.

Qarabağ - Qəbələ, TURAL QURBANOV
Oyunu normal idarə etdi və iki sarı vərəqə göstərdi. 58-ci dəqiqədə Omar Hani Mateus Silvaya qarşı kobudluğa görə haqlı olaraq “sarı” ilə cəzalandırıldı. İkinci “sarı”nı isə 61-ci dəqiqədə Julio Romao Tettehlə mübarizədə qaydanı pozduğu üçün passivinə yazdırdı. Komandalar arasında ciddi səviyyə fərqinin olduğunu nəzərə alsaq, idarəçiliyin mübahisə doğurmaması anlaşılandı.