9-cu turdakı hakim qərarlarını müzakirə ediriksə, baş məşqçilərin oyunsonrası mətbuat konfranslarında bu mövzunu müzakirəyə çıxarmadığını vurğulamalıyıq. Yəni udan da razı qaldı, uduzan da. Ümumiyyətlə, tur səliqəli keçdi, heç bir futbolçu qırmızı vərəqə ilə cəzalanmadı. 5 oyunda 19 sarı vərəqə də faciəvi göstərici deyil.

Zirə - Turan Tovuz, İNQİLAB MƏMMƏDOV

İlk dəqiqələrdən mübarizə meydanın mərkəzində getdiyindən hakimin işi o qədər də çətin olmadı. Müzakirəyə açıq olan epizod hakimin 21-ci dəqiqədə Denis Marandiçinin Qismət Alıyevə qarşı kobudluğuna görə rəsmi xəbərlarlıq etməli olduğu halda, mülayim davranmasıdı. Ümumiyyətlə, İnqilab bəy oyunboyu futbolçuların xətrinə dəyməmək üçün maksimum çalışdı. Referi cəmi 1 dəfə əlini cibinə atdı ki, onda da meydan sahiblərinin kapitanını cəzalandırdı.

Qəbələ - Səbail, RƏVAN HƏMZƏZADƏ

Oyunda elə bir mübahisəli vəziyyət yaşanmadı. Rəvan Həmzəzadə oyunu normal idarə elədi. Buna da səbəb görüşün sakit tempdə keçməsi idi. İlk sarı vərəqə 31-ci dəqiqədə Osama Xalaylaya qarşı kobudluq edən Süleyman Əhmədova göstərildi. Şahin Diniyev narazılığını bildirsə də, Əhmədovun Xalaylanın ayağını tapdaladığını gördük. 71-ci dəqiqədə isə Emin Səfərov Süleymana qarşı kobudluğa görə haqlı şəkildə vərəqə ilə cəzalandırıldı. 3-cü və sonuncu sarı vərəqəsi təhlükəli hücumun qarşısını kobuluqla alan Ahmed Ayzayanın adına yazıldı.

Sabah – Araz-Naxçıvan, RAUF CABBAROV

Bu oyunun nəticəsi xüsusən meydan sahibləri üçün çox vacib idi. Bu üzdən “Sabah”ın qələbə naminə aqressiv çıxış edəcəyi gözlənilirdi. Lakin hər iki tərəf intizamlı oyun göstərdi. Bu isə Rauf Cabbarovun yükünü xeyli azaldı. Düzdü, hakim bəzi epizodlarda mərhəmətli davrandı. Amma iki dəfə əlini cibinə atdığını qeyd etməliyik. Ədalət təmsilçisi 67-ci dəqiqədə Vanderson Melonu, 83-cü dəqiqədə Zamiq Əliyevi “sarı”yla cəzalandırdı. Maraqlıdı ki, “Araz-Naxçıvan”ın hər iki futbolçusu məhz Anatoli Nuriyevə qarşı qaydanı pozdu. Melo “Sabah”ın oyunçusunu əllə zərbə endirərək, Zamiq isə kobud müdaxilə ilə dayandırmışdı. Ümumilikdə hakim bizə tənqid üçün mövzu vermədi. Buna, sadəcə, sevinə bilərik.

Sumqayıt – Kəpəz, EMİN ƏLİYEV

Komandalar meydana uduzmamaq üçün çıxmışdı. Emin Əliyevin referi kimi hələ püxtələşməyə ehtiyac duyduğu göründü. Belə ki, referi “üstünlük” prinisipinə əsaslanmaq, "Kəpəz" futbolçularının ilk dəqiqələrdən özünü yerə atıb “vaxt öldürmək” hallarında təcrübəsizlik etdi. Mübahisəyə açıq iki epizod var idi. 42-ci dəqiqədə Əli Səmədov Murad Xaçayevlə top uğrunda mübarizədə yerdə qalsa da, hakimin fiti susdu. 55-ci dəqiqədə Rövlan Muradovun qapı önünə asması zamanı topun rəqib müdafiəçinin əlinə dəyməsiylə bağlı iddalar səslənsə də, nə referidən, nə VAR otağından reaksiya gəldi. Ədalət naminə Əliyevin kobud səhvlərə yol vermədiyini də vurğulamalıyıq.

Neftçi – Qarabağ, RƏŞAD ƏHMƏDOV

Çox gərgin mübarizə şəraitində keçən oyunda Rəşad Əhmədov yaşananlara tab gətirə bildi. Futbolçular arasında yaşanan anlaşılmazlıqlar zamanı referi qırağa çəkilərək hadisələrə nəzarət edirdi. Yekunda başverənlərə uyğun qərarını verirdi. Lakin bəzi məqamlarda Əhmədovun davranışı qəribə idi. Məsələn, 56-cı dəqiqədə Emin Mahmudov qaydanı pozdu. "Qarabağ" futbolçuları millinin üzvünə sarı vərəqə verilməsini istəyirdi, "Neftçi" oyunçuları isə kapitanın qaydanı pozmadığını bildirirdi. Əvvəlcə ağdamlıların xeyrinə qərar verən referi VAR-dakıların müdaxiləsindən sonra cəirmə zərbəsini bakılıların xeyrinə verdi. Belə kiçik nüansları nəzərə almasaq, referi görüşü ideala yaxın idarə etdi.