Dünən Bakı vaxtı ilə gecə saatlarında Braziliya çempionatında mövsümə yekun vuruldu.

Ən böyük sürpriz ''Urbano Kaldeyra''da qeydə alındı. ''Santos'' evdə ''Fortaleza''ya 1:2 məğlub olaraq böyük şok yaşadı. Özü də komanda ikinci qolu əsas vaxta əlavə olunmuş 6-cı dəqiqədə buraxdı. Bu nəticə ilə Braziliya futbolunun ən köklü, tanınmış və titullu klublarından olan ''Santos'' 111 illik tarixində ilk dəfə elitanı tərk etdi!

Bilindiyi kimi bu klub dünya futboluna Pele, Neymar kimi isimləri bəxş edib. Ötən il dünyasını dəyişən futbol kralı Pele karyerasının böyük hissəsini məhz bu klubda keçirib. Yerli fanatlar final fitindən sonra böyük bir üzüntü yaşayaraq göz yaşlarını saxlaya bilməyiblər. Onlar şəhərin bir çox yerlərində maşınlar yandırıblar və dükanların şüşələrini qırıblar

Fanatlarla polislər arasında çaxnaşma yaşanıb. ''Santos'' ''San Paulu'' və ''Flamenqo'' ilə birlikdə heç vaxt elitanı tərk etməyən 3 klubdan biri idi. Amma indi bu statusda olan klubların sayı 2-yə endi. Onu da bildirək ki, ''Palmeyras'' ardıcıl 2-ci, tarixində 12-ci dəfə çempionluq sevinci yaşadı.

ƏLİ