Ötən il dekabrın 29-da 82 yaşında vəfat edən Pele artıq torpağa tapşırılıb.

Football-plus.az xəbər verir ki, Braziliya və dünya futbolunun əfsanəsi yanvarın 3-də dəfn olunub.

Pele “Ginnesin rekordlar kitabı”na düşən 14 mərtəbəli “Ekumenika” nekropolunda dəfn olunub. Buranı özü seçmişdi. Bu məkanın qəbiristanlıq kimi görünməməsi, insanın ruhuna rahatlıq verməsi ilə izah etmişdi. Qeyd edək ki, “Ekumenika”da Pelenin atası və qardaşı da daxil olmaqla qohumları ilə dostları da dəfn olunub.

Dəfn mərasimində iştirak edən Canni İnfantinonun davranışı birmənalı qarşılanmayıb. FİFA-nın prezidenti Pelenin tabutunun yanında selfi çəkib. Sosial şəbəkə istifadəçiləri onun bu hərəkətini “biabırçılıq” adlandırıb və mərhumun yaxınlarına hörmətsizlik kimi dəyərləndiriblər. İnfantino isə Pelenin keçmiş komanda yoldaşları ilə şəkil çəkdirdiyini və bunun onlar üçün yaxşı jest olduğunu bildirib. Yeri gəlmişkən, FİFA-nın rəhbəri bu təşkilata üzv olan bütün ölkələrdən bir stadionun adının Pelenin şərəfinə dəyişdirilməsini xahiş edəcəyini açıqlayıb.

Artıq vətənində sabiq üçqat dünya çempionunun xatirəsi əbədiləşdirilib. “Marakana” stadionunun yaxınlığındakı küçələrdən birinə Pelenin adı verilib. Bu barədə stadionun yerləşdiyi Rio de Janeyro şəhərinin meri Eduardo Paes şəxsi “tvitter” hesabında paylaşım edib. Küçəyə vurulan lövhəyə “Edson Arantes du Nasimentu (Pele) əsrin idmançısı, bütün zamanların ən böyük futbolçusudu. O, dünyanın gözündə Braziliya ilə sinonimdi” yazılıb.

Amma Pelenin 1956-74-cü illərdə çıxış etdiyi “Santos”da daşıdığı “10” nömrəli forma əbədiləşməyəcək. Klubun prezidenti Andres Rueda mərhumun bir neçə il əvvəl verdiyi müsahibəsində bunu özü istədiyini bildirib.