Tur cümə günü Zinshaymda start götürdü.

“Football-plus.az” xəbər verir ki, mövsümə yaxşı başlayan “Hoffenhaym” nə qədər çalışsa da, 71-ci dəqiqədən azlıqda oynayan Dortmund “Borussiya”sından xal qopara bilmədi. “Arılar”ın iştirakı ilə keçən son 133 bundesliqa matçının heç biri qolsuz bitməyib və bu, turnirin yeni rekordudu! “Borussiya” 2018/19-dan bəri ilk dəfə mövsümün ilk 6 turunu məğlubiyyətsiz tamamladı. Onu da bildirək ki, Hummels “Borussiya”nın heyətində 347-ci bundesliqa matçında 206-cı qələbəyə sevindi. O, klub tarixində daxili çempionatda ən çox qələbə qazanan futbolçu statusunda olan əfsanəvi Mihael Tsorkun rekordunu təkrarladı. Amma Tsork 206 qələbə həddinə 463 oyunda çatıb.

Şənbə günü əsas diqqətlər Leyptsiqə yönəlmişdi. Son vaxtlar “Bavariya”nın qəniminə çevrilən “öküzlər” yenə ölkə futbolunun flaqmanını büdrətməyə müvəffəq oldular. Özü də Marko Rozenin komandası Münhen nəhənginin qapıçısının və müdafiə xəttinin inamsız oyunundan faydalanaraq fasiləyə 2 topluq üstünlüklə yollandı. “Leyptsiq” buna qədər fasiləyə 2 topluq üstünlüklə yollandığı 39 bundesliqa matçının hamısından qələbə ilə ayrılmışdı! Amma bu dəfə alınmadı. “Bavariya” 2-ci hissədə “Bavariya” olduğunu xatırlayaraq hesabı bərabərləşdirdi. Bununla belə, “rekordmayster”in bu rəqibi ardıcıl 4-cü rəsmi oyunda məğlub edə bilmədiyini (2 heç-heçə, 2 məğlubiyyət) xüsusi vurğulamağa dəyər. Bu xal itkisi “Bavariya”nın zirvədən 3-cü pilləyə enməsinə səbəb oldu. Çünki “Ştutqart” və “Bayer-04” hesabına növbəti qələbələri yazdı. Şvabiyalılarda mövsümə möhtəşəm start verən Girassinin qol seriyası qırılsa da, bu dəfə səhnəyə Dəniz Undav çıxdı. “Köln”lə səfər oyununda 2-ci hissədə meydana çıxan türkəsilli almaniyalı forvard dubl etməklə bundesliqada ilk qollarını vurdu. “Bayer-04” isə Maynts səfərindən asan qələbə ilə döndü. 6 tura 16 xal və 20 qol leverkuzenlilərin elitadakı ən uğurlu startıdı! “Haydenhaym”ın “Union”u yenməsi ilə unikal hadisə baş verdi. Belə ki, tarixində ilk dəfə elitada oynayan bir klub ÇL iştirakçısını məğlub etdi. Heç cür özünə gələ bilməyən “Union” ardıcıl 5-ci (!) rəsmi oyundan məğlubiyyətlə ayrıldı. Vindin növbəti dublu sayəsində “Volfsburq” “Ayntraxt”a mövsümdəki ilk məğlubiyyəti yaşatdı. Buna qədər “canavarlar”ın heyətində ilk 6 tura 7 qol vuran futbolçu olmamışdı. “Frayburq” 3 oyunluq qələbəsiz seriyaya son qoydusa, Münhenqladbax “Borussiya”sı ilə “Darmştadt” hesabına ilk qələbəni yazdı. Özü də “Darmştadt” tarixində ilk dəfə elitada ev oyununda 4 qol vurdu. Buna qədər komanda bundesliqada 4 qol vurduğu hər iki oyunu səfərdə keçirmişdi.

6-cı tur
Leyptsiq – Bavariya 2:2
Openda, 20. Lukeba, 26 – Keyn, 57-p. Sane, 70. (47069)
Leyptsiq: Blasvix, Henrixs (Klostermann, 86), Simakan, Lukeba, Raum, Simons, Şlager, Kampl (Zayvald, 64), Forsberq (Baumqartner, 72), Openda (Karvalyo, 86), Poulsen (Şeşko, 72).
Bavariya: Ulrayx, Laymer, Upamekano, Kim Min Çje, Devis, Kimmix, Qoretska (Gerreyro, 46), Sané, Musiala (Çupo-Motinq, 87), Koman (Tel, 46), Keyn.
Hoffenhaym – Borussiya D 1:3
Kramariç, 25-p. – Füllkruq, 18. Roys, 45+3. Ryuyerson, 90+5. (30150)
Borussiya: Kobel, Ryuyerson, Hummels, Şlotterbek, Bensebayni, F.Nmeça (Əmrə Can, 69), Salih Özcan, Malen (Zyule, 80), Roys (Volf, 80), Brandt (Adeyemi, 64), Füllkruq (Alle, 80).
Haydenhaym – Union 1:0
Beste, 59. (15000)
Union: Rönnov, Trimmel, Duxi, Bonuççi (Kaufmann, 74), Leyte (Yekkel, 61), Qosens (Russiyon, 74), Kral, Tuzar (Layduni, 78), Bekker, Fofana (Hollerbax, 74), Berens.
Maynts-05 – Bayer-04 0:3
Van den Berq, 18-öz qapısına. Qrimaldo, 59. Hofmann, 65. (33305)
Bayer-04: Qrádetski, Kossunu, Ta, Tapsoba, Frimponq (Stanişiç, 87), Palasios, Caka (Andrix, 79), Qrimaldo, Hofmann (Əmiri, 87), Virts (Adli, 64), Bonifas (Hlojek, 79).
Volfsburq – Ayntraxt F 2:0
Vind, 31; 84. (28323)
Ayntraxt: Trapp, Buta (Knauff, 60), Tuta (P.Aaronson, 82), Kox, Paço, Dina Ebimbe (Hauqe, 82), Skiri, Larsson, Çaibi (Nkunku, 68), Götse, Marmuş (Nqankam, 82).
Frayburq – Auqsburq 2:0
Qrifo, 5-p. Linhart, 56. (33134)
Frayburq: Atubolu, Şallai (Qulde, 89), Ginter, Linhart, Sildilliya, Kübler, Keytel (Röl, 20), Eqqeştayn, Doan (Filipp, 73), Qrifo (Adamu, 73), Höler (Qreqoritş, 89).
Köln – Ştutqart 0:2
Dəniz Undav, 68; 88. (50000)

Bohum – Borussiya M 1:3
Losilla, 68 – Noyhaus, 27. Plea, 37; 45+3. (26000)
Darmştadt – Verder 4:2
Bader, 5. Skarke, 25. Melem, 50. Kempe, 62-p. – Deman, 70. Velkoviç, 78. (17810)
1. Bayer-04 6 5 1 0 20-6 16
2. Ştutqart 6 5 0 1 19-7 15
3. Bavariya 6 4 2 0 20-6 14
4. Borussiya D 6 4 2 0 12-6 14
5. Leyptsiq 6 4 1 1 16-6 13
6. Hoffenhaym 6 4 0 2 13-9 12
7. Volfsburq 6 4 0 2 9-6 12
8. Frayburq 6 3 1 2 7-10 10
9. Ayntraxt F 6 1 4 1 4-5 7
10. Haydenhaym 6 2 1 3 10-13 7
11. Union 6 2 0 4 9-10 6
12. Verder 6 2 0 4 10-14 6
13. Borussiya M 6 1 2 3 11-14 5
14. Auqsburq 6 1 2 3 9-15 5
15. Darmştadt 6 1 1 4 10-18 4
16. Bohum 6 0 3 3 5-19 3
17. Köln 6 0 1 5 4-11 1
18. Maynts-05 6 0 1 5 4-17 1
Bombardirlər: Girassi (Ştutqart) – 10, Keyn (Bavariya) – 8, Vind (Volfsburq) – 7, Bonifas (Bayer-04) – 6.
Növbəti turun oyunları oktyabrın 6-8-i aralığında keçiriləcək: Borussiya M – Maynts-05, Borussiya D – Union, Leyptsiq – Bohum, Verder – Hoffenhaym, Auqsburq – Darmştadt, Ştutqart – Volfsburq, Bavariya – Frayburq, Bayer-04 – Köln, Ayntraxt F – Haydenhaym.

Turun rəqəmi
8 – çətin “Leyptsiq” səfərində penaltidən fərqlənməklə geridönüşün əsasını qoyan Keyn bundesliqada 6-cı oyunda 8-ci qolunu vurdu. Bu, “Bavariya”nın tarixi üçün rekord göstəricidi. Bundesliqanın tarixində isə ən yaxşı 2-ci göstəricidi. Daha öncə Dortmund “Borussiya”sında Pako Alkaser və “Hamburq”un heyətində Gert Dörfel də bu turnirdə keçirdiyi ilk 6 oyunda 8 qol vurmuşldu. Rekord isə müasir futbolun ən yaxşı qoleadorlarından biri Erlinq Holanna məxsusdu. O, bundesliqadakı ilk 6 oyunda 9 dəfə fərqlənmişdi.

Turun ulduzu
Alassan Plea (Borussiya M) – bu tur 3 futbolçu dubl etməklə diqqəti çəkdi. Amma “Volfsburq”lu Vind və “Ştutqart”lı Undavdan fərqli Plea həm də hesabına məhsuldar ötürmə yazdı. Son dönəmlərdə komandası kimi zəif təsir bağışlayan 30 yaşlı fransalı hücumçunun “Bohum” səfərində sərgilədiyi performansı sürpriz adlandırmaq olar. Çünki Plea buna qədər son 24 bundesliqa oyununda 3 qolun vurulmasında yaxından iştirak etmişdisə, bu dəfə cəmi 21 dəqiqəyə komandasına 3 qol vurmağa yardım etdi.