“Azərbaycan çempionatında əla oyunçular var”
“Çempionatda bir neçə güclü komanda və əla basketbolçular var”.
"Football-plus.az" xəbər verir ki, bunu Azərbaycan Basketbol Liqasında çıxış edən “NTD-İndiqo”nun oyunçusu Brendon Votkins klubun mətbuat xidmətinə müsahibəsində deyib.
28 yaşlı basketbolçu çempionata yaxşı legionerlərin gəldiyini bildirib:
“Həm də keyfiyyətli yerlı oyunçular görürəm. Çox geniş ehtiyat skamyası olan klublar da mövcuddu. Bütün diqqətimi komandama yönəltmişəm. Altı oyun keçirmişik. Liqanın səviyyəsi olduqca yaxşıdı. Hər matçda qalib gəlmək istəyirik. Mən də “NTD-İndiqo”nun heyətində çempion olmaq niyyətindəyəm. Heç kim ambisiyasız oynamaq istəmir. Yaxşı kollektivimiz var və düşünürəm ki, bu çempionluq olduqca realdı”.
ABŞ-dən olan oyunçu son turda “Sərhədçi”ni məğlub etmələrinə toxunub:
“Başa düşürdük ki, bu oyunda yalnız qələbə qazanmalıyıq. Matça yaxşı başladıq, amma sonra rəqibə bizə çatmaq imkanı verdik. Məşqlərdə çalışmalı olduğumuz məqamlar var. Komanda qələbə qazana bildi və bu ən vacib şeydi”.
Brendon Votkins sıx qrafikdə çıxış etmələrinə də münasibət bildirib:
“Bu oyuna təsir edir. Matç boyunca yüksək tempdə oynamaq çətindi. Çərşənbə günü “Sabah”a qarşı ağır oyun keçirdik. Və artıq şənbə günü yenidən meydançaya çıxdıq. Şadam ki, “Sərhədçi” üzərində qələbə qazana bildik. Qələbə qazanmaq çox vacib idi”.
Basketbolçu növbəti turda üz-üz gələcəkləri “Neftçi” ilə görüş haqqında da danışıb:
“Bu mövsüm “Neftçi”nin oyunlarını izləmişəm. Hər oyun vacibdir. “Neftçi”yə qarşı görüş həm də ona görə vacibdi ki, onlar liderlər sırasındadı. Biz öz işimizi görməli və qələbə qazanmalıyıq”.
Digər xəbərlər
