Dünən Azərbaycan Texniki Universitetinin idman zalında Xaçmaz təmsilçisi “NTD-İndiqo”nun yeni mövsüm ərəfəsində təqdimat mərasimi keçirildi.

Tədbirdə klub prezidenti Bəhram Abdinov, Quba-Xaçmaz regional Gənclər və İdman İdarəsinin Xaçmaz rayonu üzrə sektor müdiri Elman Məmmədov, basketbolçular, klub rəsmilər və media nümayəndələri iştirak etdi. Bəhram Abdinov giriş nitqi etdi: “Bu il ən gənc basketbolçular bizim klubumuzda cəmləşib. Hətta iki məktəbli basketbolçumuz da var. Komandamız həm Bakıda, həm də Xaçmazda məskunlaşacaq. Əsas bazamız bölgədə olacaq. Ev oyunlarında rəqiblərimizi də Xaçmazda qəbul edəcəyik. Əsas məqsədimiz güclü basketbolçular yetişdirməkdi". 

Daha sonra çıxış edən Elman Məmmədov dedi ki, Azərbaycanda bu idman növünün inkişafı istiqamətində bir sıra işlər görülür:

Tədbirdən sonra xaçmazlıların təcrübəli oyunçusu Əkbər Məmmədov "Futbol+"in bəzi suallarını cavabladı.

- Ötən mövsümü "Gəncə"də keçirmişdin. Bu komandanı niyə tərk etdin?
- "Gəncə"də hər şey əla idi. Özümü orda  xoşbəxt hiss edirdim. Kubok qazandıq, azarkeşlərimizi xoşbəxt etdik. "Sarı-göylər"dən ayrılma səbəbim həm yaxşı təklifin gəlməsi, həm də həyatımı Bakıda qurmaq istəyimlə bağlı idi. Bir də “NTD-İndiqo” mənim keçmiş komandam idi.

- Həyatını Bakıda qurmaq istəyi ilə “NTD-İndiqo”ya gəlsən də, yeni komandan da Xaçmazı təmsil edəcək...
- Bəli, bura gələndən sonra bu dəyişiklik oldu (gülür. İndiyə qədər bizə bu haqda heç bir məlumatverməyiblər.

- Artıq klub prezidenti Bəhram Abdinov da bildirdi ki, kollektiv Xaçmazda məskunlaşacaq. Səfər oyunları zamanı isə  Texniki Universitetin idman zalında toplanış keçəcəksiz.
- Əsas odu ki, komandama kömək edim. Problem deyil. Mənim burda hədəflərim var. Əlimizdən gələni edib azarkeşlərimizi sevindirmək istəyirik.

- Bəs məqsədiniz nədi?
- Bilirsiz ki, mən Cəlilabaddanam. Bu komandaya ilk dəfə 13-14 yaşım olanda gəlmişdim. Bu kollektiv həmişə meydanda xarakter göstərib. Oyunçular həmişə meydanda canlarını qoyublar. Hədəflərimizə gəlincə, ötən mövsüm mən "Gəncə"də də çıxış edəndə deyirdim ki, finalda oynayacağıq. Çox adam gözləmirdi, lakin biz bunu bacardıq. İndi də “NTD-İndiqo” ilə uğur qazanacağımıza inanıram.

- Səncə, çempionatdakı ən çətin rəqibiniz hansıdı?
- Əlbəttə, "Sabah" avrokuboklardakı çıxışı, hazırkı büdcəsi, oyunçuları ilə üstündü. Hətta biz onların Avropadakı çıxışını dəstəkləyirik. Lakin liqada "tələbələr" bizim rəqibimizdi. 

- "Gəncə"dən ayrılandan sonra təkliflərin olmuşdu?
- Bəli, təkliflər var idi. Hamısı da yerli klublardan.
Komandanın amerikalı oyunçusu Cared Smoll da da bəzi suallarımızı cavabladı.

- Komandada yenisən. Bakı haqda təəssüratın maraqlıdı...
- Şəhər, insanlar, atmosfer, hətta yeməkləriniz çox əladı. Hər şeydən razıyam.

- Sənin burdakı hədəflərin nədi?
- Əlbəttə, çempion olmaq! Həm də komandanın mövsümün sonuna kimi sağlam qalması və uğurlu il keçirməsini istəyirəm.

- Ölkə çempionatındakı rəqiblərinizi tanıyırsan?
- "Sabah" tanıyıram, avrokuboklarda uğurla çıxış edir. "Tələbələr"ə qarşı oyunlarımız çətin olacaq. Lakin biz də əlimizdən gələni edəcəyik.

CAVİD ƏLİYEV