Masazırda keçirilən oyun hər iki tərəf üçün vacib idi. “Sabah” ötən tur “Neftçi”ni məğlub etdiyindən uğurlu seriya yaxalamaq üçün meydana çıxmışdı.

“Football-plus.az” xəbər verir ki, həmçinin komandanın xal ehtiyatı azdı. Durumu yaxşılaşdırmaq üçün qələbə hava-su kimi vacib idi. Qonaqlara gəlincə, “Qarabağ” “Kəpəz”i darmadağın edərək liderliyə yiyələnmişdi. Qələbə həm “taxt-tac”ı geri gətirəcək, həm də “qartallar”ın yola yaxşı ab-havada davam etməsinə səbəb olacaqdı. İlk dəqiqələrdə qarşılıqlı hücum cəhdlərini izlədik. Yusif və Tyaqo üçün zərbələri dəf etmək çətin deyildi. Bu ərəfədə “Zirə”nin etibarlı müdafiə xətti, “Sabah”dan isə Amin ön planda idi. Daha sonra “qartallar” Namikin yaratdığı təhlükəli vəziyyətdən ustalıqla sovuşdu. Ardınca Volkov Letiçin yerinə yetirdiyi cərimə zərbəsini dəyərləndirə bilmədi. 42-ci dəqiqədə Apeh rəqiblə mübarizədə kobudluğa yol verdi. Futbolçu Çantakiasa dirsəklə vurduğu üçün sarı, hakimin qərarına etiraz etdiyi üçün qırmızı vərəqə aldı və komandası azlıqda qaldı. Lakin yola 10 nəfərlə davam edən “tələbələr” təslim olmaq istəmirdi. Ev sahiblərinin təzyiqi və rəqib meydanında yaratdığı baxımlı epizodlar davam edirdi. Qonaqlar da əliboş gəlməmişdi. Rəşad Sadıqovun yetirmələri hesabın açılmasının qarşısını qətiyyətlə alırdı. Nəticədə ilk hissədə qol görmədik. İkinci yarının “Zirə” üçün asan keçəcəyi gözlənilirdi. Düzdü, ilk dəqiqələr belə oldu. Lakin Rüstəm qapını dəqiq nişan ala bilmədiyindən “qartallar”ın real qol şansını puç etdi. “Sabah” da izləyiciləri yaxşı mənada təəccüblənirməyi bacarırdı. Ev sahibləri ardıcıl hücumlar qurmaqla yanaşı, yaxşı müdafiə olunurdu. Nəhayət, “Zirə” 90+1–ci dəqiqədə istəyinə çatdı. Beləliklə, Rüstəm yuxarıda qeyd etdiyimiz “günahını yudu”. O, Lukoviçin uzaqdan ötürməsini qapıçı və müdafiəçiləri aldadıb, qola çevirdi. Bununla matçın taleyi həll olundu. İndi “qartallar” yenidən liderdisə, “Sabah” növbəti xal itkisiylə işini daha da çətinə saldı.

Gözdən qaçmadı
* Futbolçular meydana üzərində Azərbaycan bayrağı əks olunan və işğaldan azad edilmiş bölgələrin adlarının yazılan köynəklə çıxmışdı. Dövlət himni səsləndikdən sonra həmin formanı çıxardılar.
* “Zirə”nin “Qartal” fanklubu “Sabah” azarkeşləriylə yanaşı sektorda əyləşmişdi. Oyun başlayandan bir neçə dəqiqə sonra yerlərini dəyişdilər.
* 44-cü dəqiqədə azarkeşlər ayağa qalxıb “şəhidlər ölməz, vətən bölünməz” şüarını səsləndirdi.
*”Zirə”nin qapısına cərimə zərbəsi təyin ediləndə baş məşqçi Rəşad Sadıqov “olmaz axı belə, bu biabırçılıqdı” deyə qışqırdı.

KƏNAN BAHADIR