Oktyabrın 15-də prezident, Ali Baş Komandan İlham Əliyev Xankəndində dövlət bayrağımızə ucaltdı. Bununla da ölkə daxilində erməni separatizminin varlığına son qoyuldu.

Hazırda hər kəs bütün ərazilərimizdə sülh və əmin-amanlığın hökm sürdüyünü, bizim üçün düşmən qüvvələr tərəfindən hansısa təhlükənin olmadığını bilir. Əlbəttə, bu çox böyük xoşbəxtlikdi.

Xankəndi şəhər stadionu yenilənir...
Hadisədən sonra bir çox sahədə yeniliklərin olacağı, möhtəşəm layihələrin araya-ərsəyə gətirələcəyi bəlliydi. İndi bəhs edəcəyimiz məqam isə məhz futbolla bağlıdı. Bilindiyi kimi, Xankəndidə müasir standartlara cavab verən stadion var. Bu haqda həm “Futbol+”in, həm də digər həmkarlarımızın təqdimatında bir çox xəbərlə tanış olmusuz. Xatırladaq ki, idman qurğusu 10 mindən artıq azarkeş tutumuna malikdi, yerli “Qarabağ” vaxtilə ev oyunlarını məhz burda keçirib. Hazırda burda bərpa-yenidənqurma işləri görülür. Qondarma rejimin bayrağının rənglərində olan oturacaqlar artıq zibilliyə atılıb. Həmçinin ötən əsrdən qalan işıq dirəkləri sökülüb. Bir müddət öncə başlayan söküntünun ilkin mərhələsi arxada qalıb. Federasiyanın baş katibi Sərxan Hacıyev və Peşəkar Futbol Liqasının prezidenti Elxan Səmədov Qarabağa yollansa da, stadiondakı tədbirlərə bilavasitə AGİN tərəfindən nəzarət edilir. Tribunalar və otaqlar təmir olunur. Prosesin dekabrın 15-nə qədər tamamlanması nəzərdə tutulub. Hələ rəsmi təsdiqini tapmayan informasiyalardan biri də ölkə kubokunun 1/8 final mərhələsinin “Qarabağ” – MOİK matçının məhz bu arenada keçiriləcəyidi. Demək olar ki, idman saytlarının əksəri sözügedən bilgini dərc edib. Lakin hələ də bu məsələyə aydınlıq gəlmir. PFL-in media və marketinq direktoru Sənan Adullayevlə söhbətdə bu sualı özünə ünvanlamışam. Deyib ki, məsələ dəqiqləşmədən bu haqda danışmaq, rəsmi açıqlama vermək məqsədəuyğun deyil. Qardaş, səbəb nədi? Proseslər mətbuatdan niyə gizlədilir?

Xatırlayırsızsa, “köhlən atlar”ın rəhbərliyi – direktor Əmrah Çəlikəllə baş menecer Asif Əsgərov da oktyabrın ortalarında hüquq-mühafizə orqanlarının xüsusi nəzarəti altında Xankəndinə səfər etmişdi. Həmin xəbər də mətbuatdan gizlədilmişdi, ört-basdır edilmişdi. İndi də sanki nəsə planlaşdırılır, lakin ictimaiyyətə çatdırılmır.

“İmarət” Xankəndiyə niyə gedir?
“Qarabağ”ın ən böyük və etibarlı fanklubu “İmarət” hər kəsə tanışdı. Azarkeş qrupu uzun illərdi ki, komandanı meydanda tək qoymur. İstər ölkə daxilində, istərsə də beynəlxalq arenada bannerlərini görmüşük. İndi “İmarət” Xankəndinə yollanmaq üçün hazırlıq görür. Fanklubun rəsmi “feysbuk” səhifəsinə göz gəzdirəndə məlum olur ki, bu yaxınlarda bölgəyə səfər planlaşdırılır. İnformasiya ətrafında qısa araşdırmadan sonra bəlli oldu ki, azarkeş qrupu artıq öz maddi gücüylə avtobuslarla da razılıq əldə edib. Hətta əldə etdiyimiz məlumata görə, azarkeşlər sırasında xarici ölkələrdən gələnlər də olacaq. Görəsən, “Qarabağ”ın Xankəndidə matçı yoxdusa, tərəfdarlar bölgəyə niyə gedir? Bəlkə səbəb ölkə kubokunun 1/8 final mərhələsinin “Qarabağ” – MOİK oyunudu? Düzdü, bu fakt və iddia deyil, sadəcə, ehtimaldı. Belə deyilsə, məni bağışlayın! Yox, real vəziyyət budusa, düzünü deyin! Bütün oxlar tezliklə Xankəndidə ilk matçımızı keçirəcəyimizə tuşlanıbsa, nəyi və niyə gizlədirsiz? Qorxulu bir şey varmı?

Azərbaycan rəhbəri, ordusu və xalqı hələ heç nədən qorxmayıb. Ortada belə qürurverici iş varsa, bölüşməkdən qorxmayın!

KƏNAN BAHADIR