Azərbaycanın 100 illik yarası sağaldı.

Oktyabrın 15-də prezident İlham Əliyev Xankəndi, Xocalı, Xocavənd, Ağdərə və Əsgərana səfər edərək, həmin şəhər və qəsəbələrdə də bayrağımızı dalğalandırdı. Həqiqətən də xoşbəxt günlər yaşayırıq. Ordumuzun sayəsində Azərbaycanın suverenliyi və ərazi bütövlüyü bərpa olundu.

Futbol ictimaiyyəti də böyük sevincə qərq olub. Mediada, sosial şəbəkələrdə Xankəndi, Ağdərə, Əsgərandakı stadionlar haqqında məlumatlar paylaşılır. Artıq indidən çoxları 2023/24 mövsümündə ölkə kubokunun finalının Xankəndi stadionunda keçirilməsini istəyir. Maraq üçün bildirək ki, Qarabağdakı əsas arena 15 min yerlikdi, amma süni örtüklüdü. Stadionun vəziyyəti haqda geniş bilgimiz yoxdu. Şəkillərdə gördüklərimizə inansaq, arena yaxşı durumdadı. Sadəcə, qondarma qurumun bayrağına uyğunlaşdırdıqları oturacaqların rəngini dəyişmək lazımdı. Bu isə o qədər də çətin məsələ deyil. İstək və icazə olsa, AFFA və ya Gənclər və İdman Nazirliyi bir həftə ərzində bu problemi həll edə bilər.
Bəli, xan kəndinə qayıtdı. İndi növbə futbolundu. Azərbaycan bayrağı altında idmanın ən çox sevilən bu növündə hansısa yarışı keçirmək olar? Biz üç versiya hazırlamışıq. Həmin versiyaları diqqətinizə çatdırmaq istəyirik.

Azərbaycan kubokunun finalı
Yuxarıda qeyd etdiyimiz kimi, sosial şəbəkələrdə futbol ictimaiyyəti kubokun əsas matçının burda keçirilməsini təklif edir. Əslində ən ideal və əla variant budu. Turnirin 2023/24 mövsümü hələ ki start götürməyib. Heç püşkü də atılmayıb. Həm də finalın harda keçiriləcəyi də bəlli deyil. Sadəcə, bilirik ki, həlledici oyun iyunun 2-nə salınıb. Yəni oyunun keçirilməsi üçün nə az, nə çox - düz 6 ay var. Həmin müddətə kimi Qarabağda yaşayan ermənilərin reinteqrasiyası prosesi də sürətlənəcək. Ehtiyac olarsa, bu zaman ərzində stadiondakı problemləri də aradan qaldırmaq olar. Bunun üçün PFL Prezident Adminstrasiyasına müraciət etməlidi. Qurum icazə versə, bunu etmək o qədər də çətin deyil. PFL-in dəfələrlə kubokun finalında möhtəşəm işlər gördüyünün şahidi olmuşuq. Həm də bu amil klublara da xüsusi motivasiya verər. Bütün komandalar Xankəndi stadionunda keçirilən ilk oyunun iştirakçısı olmağı cani-qəlbdən arzulayır. Cənab Prezident İlham Əliyev də bu qarşılaşmanın fəxri protokol tribunasında əyləşsə, bayram bayrama qarışar.

“Qarabağ” bir ev oyununu Xankəndində keçirsin
Avropa Liqasının H qrupunun ilk oyununda “Qarabağ” “Molde”ni 1:0 hesabıyla məğlub etdi. Matçdan sonra Ağdam klubunun prezidenti Tahir Gözəlin jurnalistlərlə xüsusi görüşü oldu. Klub rəhməri media mənsublarının təklif və iradlarını dinlədi. Problemlər səslənən zaman “köhlən atlar”ın ev oyunlarında azarkeşlərinin sayının azlığından bəhs olundu. Ümumi müzakirədən sonra Tahir Gözəl bildirdi ki, şərait varsa, “Qarabağ”ın premyer-liqadakı ev oyunlarının biri Ağdamda keçirilsin. Amma bu gözəl şəhərimizi erməni vandallar darmadağın edib. Burda şəhərsalma prosesi azı 4-5 il çəkəcək. Həm də Ağdamda müasir standartlara uyğun stadion tikilir. Yəni “Qarabağ”ın bu şəhərdə oyun keçirməsinə hələ çox var. Lakin “köhlən atlar” Xankəndindən yana seçim edə bilər. Yuxarı dairələr bu şəhərdə oyun keçirilməsinə icazə versə, “Qarabağ” ən azı premyer-liqa matçlarından birini orda keçirə bilər. Təbii ki, bu görüş çempionatın 3-cü və ya 4-cü dövrəsinə təsadüf edəcək. “Köhlən atlar”ın seçim imkanı da genişdi. Gəlin, ermənilərin reinteqrasiyası məsələsini də unutmayaq. Bu prosesin azı 4-5 ay ərzində sürətlənəcəyini nəzərə alsaq, “Qarabağ” 4-cü dövrədə hansısa ev oyununu Xankəndində keçirilə bilər. Təqvimə baxsaq, görərik ki, “köhlən atlar” 33-cü turda “Neftçi”ni, 35-ci həftədə “Turan Tovuz”u doğma meydanda qəbul edəcək. Flaqmanla qarşılaşma mayın 3-nə, “boz qurd”la matç ayın 19-na salınıb. İdeal zamandı. Hər iki komanda könüllü şəkildə burda “Qarabağ”la oynamaq istəyər. Düzdü, çoxları deyə bilər ki, legionerlər Xankəndinə getmək istəməyəcək. Amma bu bəhanədi. Xankəndi Azərbaycanın ərazisidi və həmişə də belə qalacaq. Bakıdan bu şəhərə 364, Tovuzdan 236 km məsafə var. 15 minlik stadionu həm “Qarabağ”, həm “Neftçi”, həm də “Turan Tovuz” azarkeşləri doldura bilər. Təhlükəsizliyi təmin etmək Azərbaycan polisinin işidi. Onlar da öz işlərini həmişə ideal şəkildə görüblər. Oyunların afişaların baxın: “Azərbaycan derbisi Xankəndində”, “Qarabağ” “Turan”ı Xankəndində qəbul edir”. Elə bu başlıqlara görə oyunlardan hansısa birini məhz bu stadionda keçirməyə dəyər.

Azərbaycan – Türkiyə oyunu keçirilsin
Vətən müharibəsi zamanı Türkiyə bizə çox dəstək oldu. Qardaş ölkə açıq-aşkar bildirdi ki, bu, Azərbaycanın haqq davasıdı. Kənar müdaxilə olarsa, heç bir təklif gözləmədən Türkiyə hadisələrə müdaxilə etmək ixtiyarında idi. İndi hər şey geridə qaldı. Xankəndində beynəlxalq oyun keçiriləcəksə, bu, Türkiyəyə qarşı olmalıdı. Hər iki ölkənin qardaşlığı ölkəmizin gözəl diyarından bütün dünyaya nümayiş etdirilməlidi.

Artıq AFFA indidən stadionun UEFA lisenziyası alması üçün müraciət etməlidi. Belə olacağı təqdirdə arenada beynəlxalq oyunun keçirilməsi asan olacaq.
İndi bəlkə də çoxları deyə bilər ki, çox tələsirik. Bunların da zamanı gələcək. 30 il Qarabağa həsrət qaldıq. Ordumuz şücaət göstərərək torpaqları mənfur düşməndən təmizlədi. Şəhidlərimizin ruhu, qazilərimiz qarşısında baş əyririk ki, belə gözəl günləri bizə yaşatdılar. Onlara ömürboyu minnətdar olmalıyıq. Həm də ölkəmizdəki həyatı normallaşdıraraq onlara olan borcumuzu qaytarmalıyıq. Futboldan yazmaq isə bizim işimizdi. Xankəndi ilə bağlı təklifimizi etdik. AFFA, PFL, “Qarabağ” da istəyirsə, bunu dəyərləndirsin!

İLKİN SULTANLI