Son günlərin əsas gündəm mövzusu Xankəndi Şəhər Stadionudu. Yayılan məlumatlara inansaq, arena Gənclər və İdman Nazirliyinin (GİN) balansına verilib.

Sosial şəbəkələrdə yayılan videolardan görürük ki, stadionda təmir işləri gedir. Bir müddət öncə başlayan söküntünun ilkin mərhələsi arxada qalıb. Qondarma rejimin bayrağının rənglərində olan oturacaqlar artıq zibilliyə atılıb. Həmçinin ötən əsrdən qalan işıq dirəkləri "metallom"a atılıb.
Ən qısa zamanda arenada yeni oturacaqlar quraşdırılacaq. Bununla paralel meydançaya, paltardəyişmə və hakimlər otaqlarına ciddi şəkildə "əl gəzdiriləcək". Tribunada yeni sektor yaradılacaq, VİP-loja düzəldiləcək.

Bütün bu tədbirlər nə vaxt başa çatdırılacaq? Planda dəyişiklik olmasa, stadion dekabrın üçüncü ongünlüyündə hazır vəziyyətə gətiriləcək.

Bütün bu işlər premyer-liqanın 18-ci turunun “Qarabağ” – “Zirə” matçı ilə bağlıdı. Düzdü, əslində qarşılaşma Bakıətrafı qəsəbədə keçirilməlidi. PFL və klublar rəsmi açıqlamalarında oyunun Xankəndində mümkün təşkilindən xəbərdar olmadıqlarını deyiblər. Srağagün isə PFL 2-ci dövrənin son 4 turunun təqvimini açıqladı. Belə aydın olur ki, “Zirə” – “Qarabağ” oyunu dekabrın 24-də keçiriləcək. Maraq üçün xatırladaq ki, həmin gün Prezident İlham Əliyevin doğum günüdü, 62 yaşını tamamlayır. Həm nazirlik, həm AFFA, həm də PFL ölkəmizi düşmən işğalından azad edən rəhbərə jest kimi belə oyun təşkil edə bilər. Bizə çatan bilgiyə görə, dekabrın ortalarında PFL-in oyunun yerini dəyişdirməsi, Xankəndində keçiriləcəyini élan etməsi tam realdı.
Məsələ ilə bağlı Gənclər və İdman Nazirliyinin də mövqeyini öyrənməyə çalışdıq. Lakin qurumdan bu haqda nəsə deyə bilməyəcəklərini anlatdılar…

İLKİN SULTANLI