Bir müddət öncə “Qarabağ” rəsmilərinin – Əmrah Çəlikəllə Asif Əsgərovun Xankəndinə yollandığını diqqətinizə çatdırmışdıq. Səfərin məqsədi şəhərdəki stadionun imkanlarını nəzərdən keçirmək olub.

"Football-plus.az" xəbər verir ki, Xankəndəndindəki arenanın durumu normal olacağı təqdirdə “Qarabağ”ın premyer-liqa matçlarının bir neçəsi burda keçirilə bilər.

Səfərin detalları ilə bağlı maraqlı informasiya əldə etmişik. Bizə çatan bilgiyə görə, stadiondakı şərait o qədər də qənaətbəxş deyil. Arenanın təmirə ehtiyacı var. Xankəndindəki stadionun hakim otaqlarına və çəkiliş yerlərinə ehtiyacı var. Bundan başqa, arenanın divarlarında kosmetik dəyişiklik etmək lazımdı. Təbii ki, qondarma və artıq tarixə qovuşan qurumun bayrağının rəngində olan oturacaqlar da dəyişdirilməlidi. Bu arada stadionun tutumu 12 min nəfərlikdi, ot örtüyü sunidi. Arena yuxarıda qeyd olunan çatışmazlıqlar həllini tapandan sonra premyer-liqa matçlarını qəbul etməyə qadir olacaq.

“Qarabağ” rəsmiləri bütün bu problemləri ölkə rəhbərliyinin nümayəndələrinə bildirib. İndi stadionun təmiri üçün dövlət tərəfindən Gənclər və İdman Nazirliyinə maliyyə ayrılması gözlənilir. Deyə bilərik ki, stadionun təmiri üçün o qədər də çox vəsait lazım deyil. Lakin ölkə rəhbərliyi, ümumiyyətlə, arenanın yenidən qurulması fikrinə düşsə, vəziyyət dəyişəcək.
Ümumiyyətlə, “Qarabağ”ın Xankəndində ilk oyunu nə vaxt keçirəcəyi bəlli deyil. Ola bilər ki, bu qərar yaxın günlərdə verilsin. Amma “köhlən atlar”ın 2023-cü ildə Xankəndində oyun keçirəcəyi real deyil. Ən yaxşı halda gələn ilin əvvəllərində bu istəyin reallaşması mümkündü. O vaxta kimi həm nazirlik stadionun problemlərini aradan qaldıra, həm də ermənilərin Azərbaycan vətəndaşlığını qəbul etməsi prosesi sürətlənə bilər.

Təbii ki, “Qarabağ” problem həll olunandan sonra bütün ev oyunlarını Xankəndində keçirməyəcək. Sadəcə, 2023/24 mövsümündə iki-üç ev oyunu burdakı stadionda baş tutacaq.
Bir sözlə, “köhlən atlar”ın Xankəndində oynamaq ehtimalı böyükdü. Klub bu məsələyə isti baxır. İndi qalır dövlətin son addımı atması. Bundan sonra illərdi həsrətində olduğumuz Xanın kəndində futbol həyəcanını yaşaya bilərik.

İLKİN SULTANLI