Premyer-liqada 14-cü turun intizam baxımından ideal səviyyədə keçdiyini deyə bilərik.
5 oyunda 20 sarı vərəqə göstərilib ki, hər oyuna orta hesabla 4 sarı vərəqə düşür. Referilərdən heç biri futbolçulara qırmızı vərəqə göstərməyib. Nəhayət, turun idarəçilik baxımından qüsursuz keçməsinə dair daha bir sübut: udub-uduzmasından asılı olmayaraq, heç bir komandanın baş məşqçisi oyundan sonra idarəçilikdən narazılıq etmədi.
Sabah – Qarabağ, İNQİLAB MƏMMƏDOV
Oyunun gərgin keçəcəyi, hakimin də meydanda çox hərəkət edəcəyi əvvəlcədən bəlli idi. İlk yarıda İnqilab Məmmədov meydan sahiblərinin xeyrinə penalti verməklə diqqəti çəkdi. Referinin verdiyi qərar yerindəydi. Lunyov Sekidikanın qarşısını kobudluqla almışdı. Fasiləyə qədər baş hakim cəmi bir dəfə əlini cibinə atdı. 2-ci yarıda onun üç önəmli qərarı oldu. 55-ci dəqiqədə Cəfərquliyev topu cərimə meydançasına göndərmək istəyərkən Hadudi əllə oynadı. Bu epizod baş hakimin gözündən qaçdı. Bir qədər sonra VAR-dan gələn müdaxilədən sonra referi monitora yaxınlaşıb epizodi izlədikdən sonra penalti təyin etdi. 64-cü dəqiqədə "Qarabağ"ın müdafiəçiləri təhlükəni uzaqlaşdırmaq istəyərkən top İsayevə sıçradı, kapitan başla Sekidikaya ötürmə verdi, "70 nömrə" dəqiq zərbəylə hesab arasında fərqi azaltdı. Bu zaman Məmmədov qolu qeydə almağa tələsmədi, mümkün ofsayd ehtimalı yoxlanıldı. Referi monitora yaxınlaşıb epizodu incələdikdən sonra mərkəzi göstərdi. Bu işə 3 dəqiqə sərf olundu. 80-ci dəqiqədə Leandro Andrade cərimə meydanşasına soxularkən Seydiyevin müdaxiləsi nəticəsində yerdə qaldı. Amma hakim davam dedi. Bu zaman "Qarabağ"ın ehtiyat oyunçular skamyasından hakimə və 4-cü referiyə kəskin etiraz bildirdilər. 2-ci hissədə sürət, temp, gərginlik yüksək olduğundan ədalət təmsilçisi 4 dəfə əlini cibinə atdı. Ümumi götürəndə İnqilab Məmmədov işinin öhdəsindən gəldi.
Səbail – Kəpəz, KAMAL UMUDLU
Qarşılıqlı hücumlar şəraitində keçən oyunda hakimlər briqadası çox əziyyət çəkmədi. Kamal Umudlu bir epizodda diqqət mərkəzinə düşdü. 31-ci dəqiqədə meydan sahiblərindən Pedro Nuno rəqib qapıçını keçib zərbə endirsə də, qolkiper İqor Rodriges ona müdaxilə etdi. Nəticədə "27 nömrə" yerdə qaldı. VAR otağında epizod yoxlanıldı. Amma qayda pozuntusu qeydə alınmadı. Matçda başqa müzakirəyə açıq epizod, hadisə olmadı. Referi oyunu yaxşı idarə etdi.
Qəbələ - Turan Tovuz, RƏVAN HƏMZƏZADƏ
Oyunu normal idarə etdi. Qarşılaşmada ilk sarı vərəqə 55-ci dəqiqədə Pusinin formasını dartdığna görə Urfan Abbasova göstərildi. Hərçənd oyunçu hakimə kəskin şəkildə etiraz etsə də, bunun mənasız olduğunu epizodun təkrarına baxanda gördük. Denis Marandiçi 72-ci dəqiqədə Haninin qarşısını kobud formada aldığı üçün vərəqə ilə cəzalandı. 77-ci dəqiqədə isə Həmzəzadə 3-cü dəfə əlini cibinə ataraq Tettehi cəzalandırdı. Matçda son vərəqə 89-cu dəqiqədə “vaxt öldürdüyünə” görə Rəşad Əzizliyə verildi.
Neftçi – Araz-Naxçıvan, FƏRİD HACIYEV
Hər iki tərəfin iddialı olduğu matçda gərginlik yox idi. İlk hissədə “ağ-qaralar”, ikinci yarıda “ağ-qırmızılar” üstün oynadı. Futbolçular yetərincə təmkinli çıxış etdi və peşəkar yanaşmayla diqqəti çəkdi. Bütün bunların fonunda Fərid Hacıyev üçün çətin sınaq olmadı. Bəzi hallarda yumşaq mübahisələr və qayda pozuntuları qeydə alındı ki, xəbərdarlıq və cəzalar yerində oldu. Ümumiyyətlə, ədalət təmsilçisi köməkçilərinin də dəstəyi ilə oyunun axarına uyğun idarəçilik ortaya qoydu.
Sumqayıt - Zirə, ƏLİYAR AĞAYEV
Turun ən vacib görüşü ölkənin ən istedadlı referisinə tapşırılmışdı. Əliyar Ağayev qarşılaşmanı ideala yaxın idarə etdi. Təsəvvür edin ki, o, futbolçulara yalnız bir sarı vərəqə göstərdi. FİFA hakiminin qərarları futbolçular tərəfindən ciddi etirazla qarşılanmırdı. Lakin Rövlana sarı vərəqə göstərilən zaman "Sumqayıt" azarkeşləri Əliyarı kəskin tənqid etdilər. Bundan başqa, matçın sonlarına yaxın "kimyaçılar"ın fanatları topun "Zirə"nin futbolçusunun əlinə dəydiyini zənn edərək hakimdən penalti verməsini tələb etdi. Lakin epizodun təkrarına baxanda "Zirə"nin üzvü Ruan Renatonun təmiz oynadığı açıq-aşkar göründü. Matç ərzində hakimliklə bağlı başqa qəribə hadisə yaşanmadı. FİFA referisinin bu oyunu adına layiq idarə etdiyini söyləyə bilərik.