Demək olar ki, hər turda baş məşqçilərdən biri idarəçiliyin səviyyəsindən kəskin şəkildə narazılıq edir.

10-cu turun “Sabah” – “Sumqayıt” oyunundan sonra qonaqların çalışdırıcısı Hitler Almaniyasının məxfi polisini yada salmışdısa, bu dəfə Qurban Qurbanov narazılığını gizlətmədi. “Qarabağ”ın baş məşqçisi “ikinci qolda hörmətli hakimlərimiz cərimə zərbəsi verməliydilər”, - deyə gileyləndi. Bəs 11-ci turun oyunlarının hakimliyini ümumilikdə necə qiymətləndirmək olar?

Turan Tovuz – Kəpəz, İNQİLAB MƏMMƏDOV
Qərb derbisi turun gərgin keçəcəyi bəlli olan oyunlarından idi. Bu üzdən hakimlik yüksək səviyyədə olmalıydı. İnqilab bəy öhdəsinə düşən vəzifəni layiqincə yerinə yetirdi desək, yanılmarıq. Baxmayaraq ki, haqlı qərarlar “Kəpəz” azarkeşlərinin təhqirləri ilə müşayiət olundu. Gəncəlilərin sayılmayan 2 qolunda məhz qonaq futbolçuların səhvi gözdən qaçmadı. Maraqlıdı ki, Azər Məmmədovun yetirmələri intizam cəhətdən də hazırlıqlı deyildi. Odu ki, 4 sarı vərəqəyə yiyələnənlər məhz “sarl-göylər” oldu. “Bozqurd”un hər baxımdan mütləq üstünlüyü fonunda keçən oyunda artırılan vaxt da uyğun idi. Ümumiyyətlə, dinamik matçda təmkinli davranan ədalət təmsilçisi özünü yaxşı tərəfdən göstərdi.

Sumqayıt – Qəbələ, CAVİD CƏLİLOV
Qolsuz keçən matçda mübahisəli vəziyyətlərə rast gəlmədik. Matçda ilk sarı vərəqə haqlı olaraq 39-cu dəqiqədə Dossoya qarşı kobulduq edən Ociqavaya göstərilldi. 45-ci dəqiqədə isa Gilad Abramov topsuz epizodda Kamran Əliyevin ayağına müdaxilə etdiyi üçün “sarı”sını aldı. 62-ci dəqiqədə “kimyaçılar”ın kapitanı Vüqar Mustafayev də vərəqə alanlar siyahısına qoşuldu. O, Mehracın əks-hücuma çıxmasının qarşısını kobudluqla aldı. Həmçinin də Mustafaeyv mövsümdə dördüncü vərəqəni aldığı üçün növbəti turdakı “Araz-Naxçıvan”la matçı buraxacaq. 84-cü dəqiqədə Rövlan Muradovun Auşeriyanın ayağına zərbə vurduğuna görə “sarı” ilə cəzalanması da haqlı idi.

Zirə - Səbail, RAUF CABBAROV
Hər iki tərəf ötən turuğursuzluğa məruz qalmışdı. Odu ki, Rauf Cabbarovu ağır matçda çətin iradəçilik gözləyirdi. Hakimin mübahisəyə açıq epizodlarla yadda qaldı. 36-cı dəqiqədə Cibrila cərimə meydançasına soxulub topa yiyələnmək istəyərkən Süleymanla Səlahətin sıxışdırmasından sonra yerdə qaldı. Meydan sahiblərinin penalti gözləntisi olsa da, referinin fiti susdu. 39-cu dəqiqədə Suma sürətli hücuma çıxarkən Qomis ona qarşı kobudluq etdi. Baş hakim qayda pozuntusu qeydə alsa da, əlini cibinə atmadı. 86-cı dəqiqədə Qismət cərimə meydançasında yerdə qalsa da, hakimin fiti yenə susdu. Rauf Cabbarov maksimum dərəcədə rəsmi xəbərlıqlardan çəkinməyə çalışdı. İlk yarıda əlini cibinə atmayan referi 2-ci yarının son 15 dəqiqəsində 4 futbolçunu sarı ilə "mükafatlandırdı”.

Neftçi – Sabah, RƏVAN HƏMZƏZADƏ
Şəkili hakim oyunu ideala yaxın idarə edirdi. Lakin sonda vəziyyət bir qədər dəyişdi. Referi hər şeyi ilk hissədə qaydalara uyğun etdi. İkinci hissədə "Sabah" qol vuranda yan xətt hakimi ofsayd bayrağını qaldırdı. Bu qərar doğru idi. Yuri Matiasa 90+1-ci dəqiqədə göstərilən 2-ci sarı və qırmızı vərəqələrdə də problem yox idi. Amma Boyan Letiç qolu vurandan sonra laysmanın ofsayd qeydə alması işləri korladı. Yaxşı ki, VAR-da əyləşən Əliyar Ağayev qolu qeydə aldı. Yoxsa ölkə futbolu adına növbəti biabırçılıq yaşanacaqdı. Bir sözlə, Rəvan Həmzəzadə oyunu yaxşı idarə etsə də, köməkçiləri onu pis vəziyyətdə qoydu.

Araz-Naxçıvan - Qarabağ, ƏLİYAR AĞAYEV
FİFA referisi oyun ərzində hər şeyi düzgün etdi. Vərəqələr, qərarlar qaydasında idi. Düzdü, Qurban Qurbanov oyundan sonra referinin qərarlarından narazılığını dilə gətirdi. Amma penalti qərarı yüz faiz doğru idi. Topu itirən Bədavi Orxana qarşı cərimə meydanında qaydanı pozmuşdu. "Qarabağ"ın baş məşqçisinin etiraz etdiyi əsas epizod meydan sahiblərinin ikinci qolu zaman Yankoviçə qarşı olan kobudluq idi. Lakin həmin anın görüntülərini izlədikdə FIFA referisinin doğru qərar verdiyi açıq-aşkar görünür. Bir sözlə, Əliyar Ağayev maraqlı və gərgin keçən oyunu yaxşı idarə etdi.