Hər iki komandaya, xüsusən də "Qəbələ"yə qələbə hava və su kimi vacib idi. Amma qapıya ilk təhlükəli zərbə qonaqlardan gəldi.

2-ci dəqiqədə Marandiçinin güclü zərbəsini Rəşad qaytarmağı bacardı. Ümumiyyətlə, meydanda maraqlı oyun gedirdi. 18-ci dəqiqədə Conun ötürməsindən sonra Paçunun zərbəsi Rəşad üçün rahat top oldu. 22-ci dəqiqədə, nəhayət, Allaş Aydın Bayramovun ayıq-sayıqlığını yoxladı. Top qapıdan keçsəydi belə, ofsayd üzündən sayılmayacaqdı. 42-ci dəqiqədə bütün qayda-qanuna uyğun şəkildə vurulan qol gördük. Tettehin ötürməsindən sonra Bilel yerində fırlanaraq topu qapıçının qorumadığı küncə göndərdi. Sanki bu qol qol meydan sahiblərini ruhlandırdı. Oyun canlanan kimi yenə səhnəyə Auşeriya çıxdı. Allaş əla ara ötürməsi ilə onu Aydınla duelə göndərdi. Fransalı yarımmüdafiəçi bir qədər irəlilədiklən sonra topu elə yerə göndərdi ki, iki Aydın belə zərbənin qarşısını ala bilməzdi. 53-cü dəqiqədə “qırmızı-qaralar” tovuzluları daha bir dəfə şoka saldı. Hani cinahla əla reyd edib boş mövqeydə olan Tettehə ötürmə verdi. Samuel də topu qonaqların toruna göndərdi. Qonaqlar arabir meydanda varlığını göstərirdi. 67-ci dəqiqədə Faiq Hacıyev 3-4 metrlikdən qapıya zərbə vurmağa imkan tapsa da, Qırtımov zədələnmək bahasına olsa belə, özünü topun qarşısına ataraq qolu əngəllədi. 76-cı dəqiqdə Sərtanın ötürməsindən sonra Marandiçinin zərbəsi qeyri-dəqiq alındı. Nəhayət, 85-ci dəqiqədə Xalayla ara ötürməsi ilə Bileli təkbətək çıxardı, o da özünün 3-cü, komandasının 4-cü qolunu vurdu.

Gözdən qaçmadı
* Üçüncü qoldan sonra "Qəbələ" fanatları qapıçı Aydın Bayramova ünvanlanan "Aydın, sən Allah, 4-cü qolu da burax" şüarını səsləndirdi. Qapıçı da onlara sərt baxışlarla cavab verdi.
* 4-cü qoldan sonra "Qəbələ" fanatları Aydını təhqir etməyə başladılar. Bu dəfə isə qolkiper əsəblərini cilovlaya bilmədi, eyni şəkildə cavab verdi.
* Tovuzlu fanatlar Rəvan Həmzəzadənin ünvanına təhqiramiz ifadələr səsləndirdi.
* Oyunun son saniyələrində isə meydan sahiblərinin fanatları rəqib azarkeşlərə əlləri ilə "4 top vurmuşuq" işarəsini göstərdilər.
* "Qəbələ" 4-cü qolu vurandan sonra nə qədər qəribə görünsə də, meydan sahiblərinin bəzi azarkeşləri tribunaları tərk etdilər.
* "Turan Tovuz" fanatları komandalarının böyük hesabla məğlub olmasına baxmayaraq, ehtiyac qapıçı Kamal Bayramovun ünvanına “Kamal, futbolçularla birlikdə yanımıza gəl" şüarını səsləndirdi. Oyunçular bu xahişi yerinə yetirdi və hər iki tərəf bir-birlərinə alqışladı.

CAVİD ƏLİYEV