Voleybolçular üç aydı pul almır, federasiya susur, Hacı Nuran isə...
Kişi voleybolçulardan ibarət “Xarı Bülbül” (Şuşa) və “Xarı Bülbül” (Laçın) komandaları dağılmaq astanasındadı.
Klub prezidenti Nuran Hüseynov (Hacı Nuran) sponsor tapmaqda çətinlik çəkdiyi üçün bu iki komanda ilə yolları ayırıb. Belə görünür ki, şuşalılar Çağırış kubokunun 1/16 final mərhələsinin “Panatinaikos”la cavab görüşü üçün də Yunanıstana yollanmayacaq. Həmin oyun noyabrın 29-da keçirilməlidi. Məsələ ilə bağlı klubun meneceri Zaur Musayevin fikirlərini öyrəndik:
”Bəli, hazırda komandada vəziyyət ürəkaçan deyil. Üç aydı maaşlarımızı almırıq. Çağırış kubokunun cavab görüşü üçün Yunanıstana yollanmalıyıq. Bu məsələ də hələ dəqiq deyil. Təəssüf ki, sponsor tapa bilmədik. Legioner oyunçular da bizə yaxınlaşıb nə vaxt pul alacaqlarını soruşurlar. Heç bir konkret söz deyə bilmirəm”.
Laçın təmsilçisinin baş məşqçisi, həmçinin də Ziya Rəcəbovun köməkçilərindən olan Cavid Süleymanov isə bu məsələdə Nuran Hüseynovu günahlandırdı:
“İndiyə kimi Nuran Hüseynov kluba cibindən 1 manat pul belə qoymayıb. Hər şeyi komandanın təsisçi-direktoru İlqar İmamquliyev edirdi. Hacı Nuran bura gələndə bizə verdiyi vədləri açıqlasam, ölkədə qalmaqal yaranar. Mənim onunla düşmənçiliyim yoxdu. Sadəcə, o, “Xarı Bülbül”ə heç bir maddi yardım etməyib”.
Nuran Hüseynovun meneceri Zakir Quliyev məsələ ilə bağlı bunları dedi:
“Birincisi, mediada olan xəbərlərə görə, Nuran Hüseynov komandadan uzaqlaşdırılıb. Bu necə ola bilər? Axı Nuran müəllim elə klubun rəhbəridi. Həmçinin də onun sponsor axtaran vaxtı deyil. Sadəcə, bu işlərlə maraqlananlar var idi. Təəssüf ki, alınmadı və indi komanda ilə əlaqlərini kəsdi. Bəlkə də “Xarı Bülbül”ə başqa rəhbər gələ bilər”.
Komandanın baş məşqçisi Ziya Rəcəbov da dağılma xəbərini təsdiqlədi. Azərbaycan Voleybol Federasiyasının mətbuat xidmətinin rəhbəri Şəfəq Kərimova isə qurumun klubların işlərinə qarışmadığını deməklə kifayətləndi.
CAVİD ƏLİYEV
