''Fənərbaxça'' ilə Jorje Jezuş arasında problem həll olunub.

"Football-plus.az" xəbər verir ki, ötən mövsüm ''sarı-lacivərdlilər''i çalışdıran tanınmış portuqaliyalı mütəxəssis birillik Türkiyə macərasının ardından Səudiyyə Ərəbistanına yollandı. Hazırda o, ''Əl-Hilal''ı çalışdırır.

Bu yaxınlarda məlum olmuşdu ki, Jezuş Türkiyə kubokundakı qələbə üçün nəzərdə tutulan bonusu almayıb. Hətta 69 yaşlı çalışdırıcının İstanbul nəhəngindən FİFA-ya şikayət etməyə hazırlaşdığı da iddia edilmişdi. Amma Jezuşun FİFA-ya üz tutmadan öncə göndərdiyi son xəbərdarlıq məktubunun ardından ''Fənər'' rəhbərliyi onunla anlaşmağa müvəffəq olub. Hansı məbləğdən söhbətin getdiyi bilinməsə də, Türkiyə mətbuatının yazdığına inansaq, məşqçiyə çatmalı olan pul artıq onun hesabına yatırılıb. Bu üzdən məsələ FİFA-ya daşınmayacaq.

Xatırladaq ki, ''Fənər'' ötən mövsüm Jezuşun başçılığı altında 52 rəsmi oyundan 35 qələbə, 10 heç-heçə, 7 məğlubiyyətlə ayrılmışdı. Komanda Türkiyə çempionatında 2-ci pilləni tutmuş, Türkiyə kubokunun isə qalibi olmuşdu.

ƏLİ