Artıq I qrupunda əsas suallara cavab tapılıb.

“Football-plus.az” xəbər verir ki, noyabrın 18-də keçirilən 9-cu turun oyunlarında qeydə alınan nəticələrdən sonra proqnozlar doğruldu: imkanları daha yüksək dəyərləndirilən Rumıniya və İsveçrə yığmaları qitə çempionatına vəsiqələri təmin etdilər.

Yaxın Şərqdə davam edən müharibə vəziyyəti İsrail yığmasına çox pis təsir etdi. Bilindiyi kimi, bu komandanın əvvəlki turlardan təxirə salınan oyunları noyabrın 12-də və 15-də keçirilmişdi. Alon Hazanın çalışdırdığı komanda həmin günlərdə uyğun olaraq Kosovo (0:1) və İsveçrə (1:1) ilə matçlarda hesabına yalnız bir xal yazmaqla AÇ-2024-ün final mərhələsində oynamaq şansını yetərincə azaltmışdı. Yəhudilər sonuncudan əvvəlki turda Rumıniyaya qalib gəlməyə borclu idilər. Əks halda onların seçmə turnirdə olan-qalan şansı da yox olacaqdı. Məlum səbəbdən ev oyunlarını neytral meydanda – Macarıstanın Felçut şəhərində keçirən asiyalılar Rumıniyadan xal belə ala bilmədilər. Hərçənd matçın lap əvvəlində Zahavi hesabı açmaqla komandasının uğurlu startına səbəbkar olmuşdu. Qeyd edək ki, 36 yaşlı hücumçu bir müddət əvvəl beynəlxalq karyerasını başa vurmuşdu. Ancaq milli komandanın çətin vəziyyətə düşməsi Eranı qərarını dəyişməyə vadar etmişdi. Onun vurduğu qola görə israillilərin sevinci çox da çəkmədi: Puşkaş hesabın açılmasından 8 dəqiqə sonra cavab qolunu vurdu. Qollu başlanğıcdan sonra ilk hissədə hesab daha bir neçə dəfə dəyişə bilərdi. Lakin tərəflər şanslardan yararlana bilmədilər. Fasilədən sonra daha yaxşı oyun sərgiləyən rumınlar ikinci yarının ortalarında Hacinin dəqiq zərbəsi ilə önə keçdilər. Az sonra Miheyle gözəl şansı boşa verdi. Bu, azmış kimi rumın futbolçu sona yaxın qırmızı vərəqə almaqla komandasını meydanda azlıqda qoydu. Buna baxmayaraq, qələbə hesabını qoruyan Rumıniya yığması adını AÇ-2024-ün iştirakçılarının siyahısına yazdı. Edvard Yordaneskunun komandası İsveçrə ilə son oyunda uduzmayacağı halda qrupu lider kimi başa vuracaq.

Artıq İsveçrə də azarkeşlərini sevindirib. Murat Yakının çalışdırdığı komanda Kosovo ilə ev oyununda qalib gələ bilməsə (1:1) də, sona bir tur qalmış özü üçün çoxdan gözlənilən vəsiqəni təmin etdi. Qeyd edək ki, mərkəzi avropalıların sevinməsinə İsrailin uduzması da təsirsiz ötüşmədi.

Belarus isə məlum səbəbdən Macarıstanın paytaxtı Budapeştdə keçirilən matçda Andorranı minimal hesabla məğlub edərək qrupu 4-cü yerdə başa vurmaq şansını qorudu. Postsovet məkanından olan komanda bunun üçün Kosovodan səfərdə 3 xal almağa çalışacaq.

I qrupu, 9-cu tur

İsrail – Rumıniya 1:2 (1:1)

İsrail: O.Qlazer, Vitor, Dasa (Kanixovski, 62), Qoldberq, Revivo (Baribo, 77), Perets, Lavi (Abu Fani, 62), Qlux, Turqeman, Zahavi, Xalayli (Corno, 77).

Rumıniya: Moldovan, Burke, Drequşin, Skreçu (M.Marin, 77), Ratsyu, Stançu, Banku (Rus, 87), R.Marin (Çikıldeu, 87), Haci (Koman, 65), Drequş (Miheyle, 65), Puşkaş.

Qollar: Zahavi, 2 (1:0). Puşkaş, 10 (1:1). Haci, 63 (1:2).

Vərəqələr: Vitor, 37. Koman, 71. Ratsyu, 78. Baribo, 83. Zahavi, 90+3 - sarı. Miheyle, 85 – qırmızı.

Hakim: Fransua Letesye (Fransa).

18 noyabr. Felçut. 2921 tamaşaçı.

İsveçrə - Kosovo 1:1 (0:0)

İsveçrə: Zommer, Elvedi, Akanci, U.Qarsiya, Cömərt (Uqriniç, 84), Şakiri (Şteffen, 84), Caka, Fröyler (Eybişer, 66), Zakariya, Varqas (Amduni, 75), Okafor (Ndoye, 75).

Kosovo: Bekay, Aliti, Haderjonay (Hiseni, 73), Voyvoda, Dellova, Raşani (Zekiri, 46), Bitiki (Kastrati, 46), B.Berişa (Korenitsa, 66), Musliya, Ziba (Hacrizi, 86), İ.Krasniki.

Qollar: Varqas, 47 (1:0). Hiseni, 82 (1:1).

Vərəqələr: Bitiki, 16. Raşani, 29. Caka, 58. Zakariya, 76 - sarı.

Hakim: Antonuo Nobre (Portuqaliya).

18 noyabr. Bazel.

Belarus – Andorra 1:0 (0:0)

Belarus: İqnatoviç, Pavlovets, Karpoviç (Baxar, 63), Volkov, Peçenin (Laptev, 74), Parxomenko, Klimoviç (Kontsevoy, 46), Ebonq, Kaplenko (Qromıko 63), Antilevski, Morozov (Skavış, 63).

Andorra: İ.Alvares, M.Vales, Rebes (E.Vales, 66), Lyovera, Servos, De Pablos (X.Rubio, 90), Pomares (Remolins, 87), Vieyra (Puyol, 87), Alaes, Martines, Kuku (A.Sançes, 66).

Qol: Laptev, 83.

Vərəqələr: Rebes, 45+1. Martines, 70. Vieyra, 72. Laptev, 90+5 – sarı.

Hakim: Sergey Sariyev (Qazaxıstan).

18 noyabr. Budapeşt. Tamaşaçısız.

1. Rumıniya 9 5 4 0 15-5 19
2. İsveçrə 9 4 5 0 22-10 17
3. İsrail 9 3 3 3 9-11 12
4. Kosovo 9 2 5 2 10-9 11
5. Belarus 9 2 3 4 8-14 9
6. Andorra 9 0 2 7 3-18 2

21 noyabr: Rumıniya - İsveçrə, Andorra - İsrail, Kosovo - Belarus.