Türkiyə yığmasının səfərdə Almaniyanı 3:2 hesabı ilə məğlub etdiyi yoldaşlıq matçında performansı ilə ən çox diqqət çəkən oyunçulardan biri də Əbdülkərim Bardakcı oldu.

“Football-plus.az” xəbər verir ki, “Qalatasaray”da, həm də yığmada müdafiənin dirəyinə çevrilən 29 yaşlı futbolçu artıq Avropada da diqqəti cəlb etməyi bacarıb. Əbdülkərim Almaniya ilə qarşılaşmada həm ilk qolda Fərdiyə verdiyi gözəl məhsuldar ötürmə ilə, həm də matçboyu etdiyi müdaxilələrlə diqqət çəkdi. Təsadüfi deyil ki, bundestimin baş məşqçisi Yulian Naqelsmann da oyundan sonra jurnalistlərlə söhbət edərkən bu futbolçuya tərif yağdırdı: “Türkiyə yığması müdafiədə Əbdülkərim kimi bir futbolçuya sahib olduğu üçün çox şanslıdı. Dünya standartlarında bir mərkəz müdafiəçisidi. Oyunboyu gözümü ondan çəkə bilmədim. Oyundan sonra dəhlizdə xüsusi olaraq onu gözlədim və performansına görə təbrik etdim. Həqiətən də əla oynadı”. Elə Almaniya mətbuatı bu futbolçunun oyununu xüsusi qeyd edib. Əbdülkərim 7,2 bal alaraq matçın ən yaxşısı seçilib. Bu arada şaiyələrə inansaq, almanların ulduz vingeri Leroy Sane ilə Əbdülkərim arasında maraqlı dialoq yaşanıb. Bilindiyi kimi bu futbolçular son bir ayda 3-cü dəfə üz-üzə gəldilər. Oktyabrın 24-də və noyabrın 8-də onlar “Qalatasaray” ilə “Bavariya”nın Çempionlar Liqası çərçivəsindəki dueli zamanı da qarşılaşmışdılar. Sane bu 3 oyunun heç birində qol vura bilmədi. Deyilənə görə bir epizodda Bardakcı bu futbolçunun qarşısını kəsdikdən sonra Sane ona gülümsəyərək “yenə sən? Səndən qurtuluş yoxdumu” deyib. Dünən “iks”də (“tvitter”də) 4 milyona yaxın təqibçisi olan “out of context football” səhifəsi də Əbdülkərim ilə bağlı maraqlı bir paylaşım edib. Həmin paylaşımda belə desək, bu oyunçunun 3 versiyası ortaya qoyulub. Türkiyəli Əbdülkərimin dəyəri 6,5 milyon avro göstərilib. Bu futbolçu braziliyalı olacağı təqdirdə dəyərinin 35 milyon avro, ingiltərəli olacağı təqdirdə isə dəyərinin 80 milyon avro ola biləcəyinə işarə vurulub. Xüsusilə “Qalatasaray”lı fanatlar bu paylaşıma böyük maraq göstəriblər. Maraqlıdı ki, cəmi bir neçə il əvvələ qədər Əbdülkərimi hətta Türkiyənin özündə də heç kim tanımırdı. “Konyaspor”a məxsus olan, 2014-20-ci illərdə tez-tez aşağı liqa klublarına icarəyə verilən Bardakcı 2020-22-ci illərdə konyalıların heyətində diqqət çəkməyə başladı. Ötən yay bu futbolçu “Fənərbaxça”ya keçməyə çox yaxın idi. Amma Əbdülkərim “Fənər”dən illik 1 milyon avro maaş tələb edincə, başqan Əli Koç ona “sən bu pula layiqsənmi” sualını vermiş və ikilinin münasibətləri pozulmuşdu. Çox keçmədən Əbdülkərim “Qalatasaray”a transfer olunmuşdu. O öz performansı ilə hətta bu pulun artığına da layiq olduğunu göstərir. Hələ ki, Əbdülkərimə yalnız Rusiya və Səudiyyə Ərəbistanı klubları maraq göstərir. Amma bu gedişlə onun Avropa klublarından birinə transferi də sürpriz olmayacaq. “Qalatasaray” 2,8 milyon avroya transfer etdiyi təcrübəli oyunçunu bundan ən azı 2 qat baha qiymətə sata biləcəyinə inanır.