Flik Türkiyədə işlədiyi dönəmin uğursuz olduğunu düşünmür
Məlum olduğu kimi Türkiyə yığması Ştefan Kuntsun istefaya göndərilməsindən sonra onu əvəz edən Vinçentso Montellanın rəhbərliyi altında həm səfərdə Xorvatiyanı, həm də evdə Latviyanı məğlub edərək gələn il Almaniyada keçiriləcək Avropa Çempionatının final mərhələsinə vəsiqə qazandı.
“Football-plus.az” xəbər verir ki, qardaş ölkənin komandası bu gün yoldaşlıq oyunu çərçivəsində Berlində Almaniyanın qonağı olacaq. Bu arada Almaniyanın “Kikker” nəşrinin srağagünkü sayında Kuntsun köşə yazısına yer verilib. 61 yaşlı mütəxəssis 2 ilə yaxın çalışdırdığı Türkiyə yığmasındakı fəaliyyəti ilə bağlı diqqətçəkən məqamları qələmə alıb və özünü uğursuz saymadığını qeyd edib:
“Mən ayrıldıqdan sonra komandanın demək olar, dəyişməyən bir heyətlə nəhayət, AÇ-yə vəsiqə qazanması duyğusal baxımdan mənim üçün üzüntü vericidi. Türkiyə ilə bağlı hələ də qəlbimdə duyğular var. Mənim vətənimdə keçiriləcək turnirdə Türkiyənin başında yer almaq çox özəl bir duyğu olardı. Uğurlu şəkildə başlayan bu yolun uğurlu şəkildə də tamamlanması məni sevindirdi. Xələfim çox az dəyişiklik etdi. Məni bu vəzifəyə gətirən Türkiyə Futbol Federasiyasının əvvəlki idarə heyəti bir müddət sonra istefa verdi. Yeni gələn prezident aydın məsələdi ki, gec-tez baş məşqçi postuna da öz istədiyi adamı gətirəcəkdi. Sonda da məhz bunu gördük. Mənim dönəmimin uğursuz olduğunu düşünmürəm. Çox təəssüf ki, əməyimin bəhrəsini görə bilməyəcəm. Nə Berlindəki bu özəl matçda, nə də AÇ-də Türkiyənin başında olacam. Halbuki bu yoldaşlıq oyununu keçirmək məhz mənim ideyam idi. O dönəmdə Almaniyanı çalışdıran Flikə zəng vuraraq belə bir oyun keçirməyi təklif etdim. O da bu fikri müsbət qarşıladı. Berlində Almaniyaya qarşı oynamağın xüsusi önəmi var idi. Fanatlarımızla birlikdə ordakı atmosferlə erkəndən tanış olmaq istəyirdik”.
Flik sonda bu günkü matçı stadiondan yox, evdə televizordan izləyəcəyini də əlavə edib.
Yeri gəlmişkən, 2 futbolçunun adı Türkiyə yığmasının heyətindən çıxarılıb. Söhbət Cengiz Ündər və Hakan Çalhanoğludan gedir. Onların hər ikisi həm Almaniya, həm də noyabrın 21-də səfərdə Uelsə qarşı keçiriləcək oyunları buraxmalı olacaq. Cengiz sağ ayaq əzələsində ağrılar olduğu üçün yığmanın düşərgəsini tərk edib. Mövsüm hələ ki, bu futbolçu üçün uğurlu keçmir. “Fənərbaxça”nın bu yay ən bahalı transferi olan 26 yaşlı vinger zədələr üzündən ona bəslənilən ümidləri doğrultmur. Hakan Çalhanoğlu isə qripə yoluxub. Bundan başqa təcrübəli futbolçunun hamilə olan həyat yoldaşının doğuş vaxtı da yaxınlaşıb. Bu üzdən məşqçilər korpusunun qərarı ilə onun da adı heyətdən çıxarılıb. Polşalı Bartoş Frankovskinin idarə edəcəyi Almaniya – Türkiyə oyunu bu “Olimpiyaştadion”da keçiriləcək və Bakı vaxtı ilə saat 23.45-də başlayacaq.
Digər xəbərlər
