Gələn il Gürcüstan və Rumıniyanın şərikli keçirəcəyi 21 yaşa qədər futbolçular arasında Avropa Çempionatının seçmə mərhələsi tədricən sona yaxınlaşır.

"Football-plus.az" xəbər verir ki, Türkiyə yığması üçün bu seçmə mərhələ çox uğursuz alındı. 9-cu qrupda yer alan qardaş ölkənin gənclər yığması dünən öz meydanında Qazaxıstanla qarşılaşdı. Türkiyə onsuz da elə də çox olmayan şansını davam etdirmək üçün mütləq qalib gəlməli idi. Oyun ''Rəcəp Tayyib Ərdoğan''da keçirildi. Qrupda heç bir iddiası qalmayan və sonuncu pillədə qərarlaşan Qazaxıstan üstəlik 58-ci dəqiqədən etibarən azlıqda qaldı. Amma Türkiyə belə bir rəqibin qapısına yol tapa bilmədi və görüş qolsuz başa çatdı.

Bununla da Tolunay Kafkasın çalışdırdığı komandanın final mərhələsinə vəsiqə qazanmaq şansı qalmadı. Bu qrupda birbaşa turnirə vəsiqə verən birinci pillə Belçikaya (20 xal), ikinci pillə Danimarkaya (14) qismət oldu . 7 oyuna 2 qələbə, 2 heç-heçə, 3 məğlubiyyətlə yalnız 8 xal toplayan Türkiyə formal xarakter daşıyan son matçda Danimarkanın qonağı olacaq. Daha bir diqqətçəkən məqam odu ki, Türkiyə bu seçmə mərhələni evdə qalib gəlmədən başa vurdu (2 heç-heçə, 2 məğlubiyyət).