“Spartak” sanki qələbənin dadını itirib.

"Football-plus.az" xəbər verir ki, bu dəfə “ağ-qırmızılar” “Dinamo”ya qarşı ev derbisində yalnız 1 xalla kifayətləndilər.

2 qolda kobud səhvə yol verən qapıçı Selixov çox zəif təsit bağışladı. Sobolev matçı 3 qolla tamamlasa da, onlardan birini öz qapısına vurdu. “Spartak”ın rəsmi matçlarda qələbəsiz seriyası 5 oyuna yüksəldi. Bir ara çempionluqdan dəm vuran Moskva nəhəngi bu gedişlə mövsümü heç ilk “3-lük”də də tamamlaya bilməyəcək.

Maraqlıdı ki, “Dinamo” premyer-liqada ardıcıl 13-cü səfər oyununda qol vurmağı bacardı. Bu, komanda üçün yeni rekorddu! Kurban Berdıyevin çalışdırdığı “Soçi” gah nala vurur, gah da mıxa. Ötən tur azlıqda qalmasına rəğmən, səfərdə “Dinamo”nu yenən bu kollektiv bu dəfə evdə iddiasız “Krılya Sovetov”a uduzdu. Yüksəlişdə olan ÇSKA “Spartak”la xal fərqini 1-ə endirmək fürsətini əldən vermədi. “Hərbçilər” autsayder “Ximki”ni asanlıqla darmadağı etdi. ÇSKA-nın ardıcıl 4-cü turda qol buraxmadan qalib gəldiyini bildirək. Kadi bu tur qol vura bilməsə də, “Krasnodar” “Nijni Novqorod”la ev oyununda problem yaşamadı. Sergey Yuranın debüt oyununda uduzan qonaqların məğlubiyyət seriyası 5 oyuna çatdı.

Turun mərkəzi oyununda “Lokomotiv” “Zenit”i qəbul etdi. Son 4 turda xal itirməyən “Loko”nun lideri büdrədəcəyinə inananlar az deyildi. Bu oyun həm də Dzyubanın sabiq klubuna qarşı dueli kimi qiymətləndirilirdi. Təcrübəli forvard “Loko”da keçirdiyi 4 oyunda 6 top vurmuşdu. Amma nə komanda özünü yaxşı tərəfdən göstərə bildi, nə də Dzyuba. Rəqibdən üstün futbol sərgiləyən “Zenit” Kassyerranın qolu ilə qələbə qazandı. Özü də kolumbiyalı forvard piterlilərin heyətində 19-cu premyer-liqa oyununda ilk qolunu vurdu. Məğlubiyyəti həzm edə bilməyən Dzyubanın oyundan sonra Semakın əlini sıxmaqdan imtina etməsi diqqəti çəkdi. “Zenit”in “Loko”ya qarşı məğlubiyyətsiz seriyası 9 oyuna çatdı. Semak “Zenit”in başında rəsmi oyunlarda 121-ci qələbəsini qazanmaqla klub tarixində ən çox qələbə qazanan məşqçilərin siyahısında 2-ci pillədə qərarlaşan Yuri Morozova çatdı. Lider isə Pavel Sadırindi (125).