FİBA Avropa Kubokunun müntəzəm mərhələsinə uğursuz başlayan “Sabah” ilk üç oyunda məğlub olub.

"Football-plus.az" xəbər verir ki, komandamız “Mornar”, “Baxçaşəhir” və “Nimburk”la duellərdən qələbəsiz ayrılıb. “Tələbələr”in D qrupundakı rəqibi “Baxçaşəhir”in baş məşqçisi Sinan Atalay bəzi suallarımızı cavabladı.

- Əvvəlcə komandanızın qrupdakı çıxışını dəyərləndirərdiz.
- İndiyə qədər keçirdiyimiz üç oyunun ikisində tam hesabla qalib gəldik, “Nimburk”a isə son dəqiqələrdə kiçik detallar üzündən məğlub olduq. Qrupda liderlik şansımız hələ də davam edir. Düşünürəm ki, zədələrə və yeni transferlərin uyğunlaşma prosesinə baxmayaraq, lider olacağıq. Performansımız hər ötən gün artacaq.

- İki mövsüm əvvəl bu turnirin qalibi olmusuz. O vaxt köməkçi məşqçi idiz. Bu komanda ilə kubok qazanan heyət arasında nə kimi fərqlər var?
- 2021/22 mövsümündə komanda şəklində çox yaxşı performans göstərdik və kubokun finalına çıxdıq. Bu il də eyni hədəflərlə başlamışıq. Əlbəttə, indi fərqli oyunçu qrupumuz var. “Baxçaşəhər”də ötən mövsümlə müqayisədə bir çox dəyişiklik olsa da, düşünürəm ki, keyfiyyətimiz və inancımız dəyişməyib.

- Bu qrupdakı şanslarınızı necə görürsüz?
- Çətin qrupdayıq və meydanda mübarizəsiz heç bir matçı qazana bilməyəcəyimizin fərqindəyik. Nə qədər ki, oyunmuzu sona kimi göstərib mübarizə aparacağıq, onda da bütün oyunları qazanıb qrupdan lider kimi çıxa bilərik. Ümid edirəm ki, bunu bacaracağıq.

- “Sabah”ı Bakıda böyük hesabla məğlub etdiz. Sizcə, qələbədə hansı amil əsas qol oynadı?
- Heyətimizdə belə avrokubok oyunlarında iştirak edən və əla matçlar keçirən basketbolçular var. Komanda kimi oyun zamanı meydana çıxan problemləri həll etmək baxımından daha hazırlıqlı və təcrübəliyik. Önəmli üstünlüklərimiz var, ancaq bu, sizin rahat qələbə qazanmağınıza şərait yaratmır. Oyuna, rəqibə qarşı ciddi hazırlaşdıq. Oyunçularım qələbə üçün inadkarlıq göstərdilər. Bunun nəticəsində də qalib gəldik.

- “Sabah”la bağlı nə düşünürsüz?
- “Sabah” da digər rəqiblər kimi qalan oyunlarda qalib gəlmək üçün əlindən gələni edəcək. Əlbəttə, indiyə kimi qələbə qazanmaması “Sabah”ın işini çətinləşdirir. Amma basketbolda hər şey mümkündü.

- Azərbaycan təmsilçisi sizə görə avrokuboklarda necə performans göstərir?
- “Sabah” FİBA Avropa Kubokunda əsas mərhələyə vəsiqə qazanmaq üçün vacib sınaqlardan keçdi. Və bura qədər irəliləməyin sürpriz olmadığını göstərirlər. Oyun zamanı hesabda geri düşsələr də, sona kimi mübariə aparırlar, təslim olmurlar. Düşünürəm ki, onlar üçün hələ hər şey irəlidədi.

- “Sabah”dan hansı oyunçu diqqətinizi cəlb etdi?
- “Sabah”ın hər oyunçusu dəyərli və keyfiyyətlidi. Bir oyunçunun üzərində dayanmaq mənim adıma düzgün olmaz. Yaxşı baş məşqçiyə sahibdilər. Qalan üç oyun onlar üçün finala bərabər olacaq. Qarşıdakı matçlarda komandanıza uğurlar arzulayıram.

- Noyabrın 15-də “Sabah”ı qəbul edəcəksiz. Həmin matçda qalib gəlmək şansınız nə qədərdi?
- Əvvəlcə onu deyə bilərəm ki biz “Sabah”ı ən yaxşı şəkildə qəbul edəcəyik. Çətin oyun olacaq, amma inanıram ki, doğma azarkeşlər önündə qələbə qazanan tərəf olacağıq.

CAVİD ƏLİYEV