“Sabah” debütdə Avropanı təəccübləndirməyi bacardı! - REPORTAJ
Ölkəmizi 18 illik fasilədən sonra basketbol üzrə FİBA Avropa Kubokunda təmsil edən “Sabah” A qrupunda qarşılaşdığı rəqiblərin üçünü də - “Donar”, “Rabotniçki” və “Rapid”i məğlub etdi.
Boban Mitevin çalışdırdığı komanda bununla da qrup lideri kimi müntəzəm mövsümdə iştirak hüququna yiyələndi. “Tələbələr” burda “Mornar” (Monteneqro ), “Baxçaşəhir“(Türkiyə ) və “Nimburk” (Çexiya) ilə qarşılaşacaq. Bir daha sizi nəticələrlə tanış edirik:
Donar (Qroningen, Niderland) – Sabah 72:75 (23:18, 14:22, 20:19, 15:16)
Sabah – Rabotniçki (Skopye, Şimali Makedoniya ) 83:81 (15:25; 22:22, 27:13, 19:21)
Rapid (Buxarest, Rumıniya) – Sabah 71:91 (12:22, 13:27, 26:23, 19:18)
Reqlamentə əsasən, müntəzəm çempionatda 10 qrupun qalibləri və 2-ci yeri tutanlar arasından ən yaxşı göstəricilərə malik olan 6 komanda növbəti mərhələdə oynamaq hüququ qazanacaq. Sizi D qrupunda yer alacaq təmsilçimizin oyunlarının təqvimini təqdim edirik:
18 oktyabr. Mornar - Sabah
25 oktyabr. Sabah – Baxçaşəhir
1 noyabr. Nimburk – Sabah
8 noyabr. Sabah – Mornar
15 noyabr. Baxçaşəhir – Sabah
22 noyabr. Sabah – Nimburk
Beləliklə, “Sabah” debüt ilində uğurlu nəticə göstərməklə hər kəsi təəccübləndirməyi bacardı. Bu uğurla bağlı kapitanı Endər Poladxanlı “Futbol+” üçün fikirlərini bölüşdü:
“Turnirdən əvvəl də “Rapid”i ən təhlükəli rəqib sayırdıq. Lakin bu oyuna ciddi hazırlaşmağımız və onların bizi ciddiyə almaması rahat qələbəni gətirdi. Tunirdəki çıxışımız çox əla alındı. Düzdü, həmişə birinci oyunlar çətin olur. Həmçinin də yarada debüt etməyimiz təcrübə baxımından çətinlik yarada bilərdi. Ancaq hadisələr tam başqa cür alındı. Növbəti mərhələdəki komandalara gəlincə, məncə, daha təhlükəlisi Türkiyə təmsilçisi “Baxçaşəhir”di. Amma indidən nəsə demək tezdi. Hələ rəqibləri təhlil etməmişik”.
26 yaşlı basketbolçu yenidən sürpriz etmək istədiklərini bildirdi:
“Mənə görə məğlub edə bilməyəcəyimiz rəqib yoxdu. Çox güclü heyətimiz var. Müntəzəm mövsümdə də uğurlu çıxış edib, daha bir sürpriz etmək niyyətindəyik”.
Komandanın baş məşqçisi Boban Mitevin fikirləri:
"Praktiki olaraq yaxşı çıxış etdik. Bilirdim ki, fərdi bacarıqları yüksək olan oyunçularım var. Mənim işim bu fərdi keyfiyyətləri sistemli komanda oyununa çevirmək idi. Düzünü desəm, biz bura minimum bir oyunda qələbə qazanmağa gəlmişdik. Bəzi epizodlarda ribaundda, bəzən müdafiədə və atışlarda uğursuz olsaq da, bu oyun qrupda keçirdiyimiz ən yaxşı qarşılaşma idi. Oyunçular əsl döyüşçü kimi mübarizə apardılar. Biz düzgün yoldayıq. Belə düşünməyə nikbin əsaslarım var. Bakıda keçirəcəyimiz avrokubok oyunlarında tribunaları dolu görmək istəyirik".
Təhsil naziri Emin Əmrullayev də komandanı təbrik edib:
“Sabah” basketbol klubunu Avropa Kubokunda əsas mərhələyə çıxması münasibəilə təbrik edirəm. Bu, Azərbaycan basketbolu üçün tarixi naliyyətdi və böyük basketbol Azərbaycana gəlir”.
