FİBA Avropa Kubokunun müntəzəm mərhələsində mübarizə aparan “Sabah” sabah növbəti oyuna çıxacaq.

"Football-plus.az" xəbər verir ki, Boban Mitevin çalışdırdığı komanda Çexiyada qrup lideri “Nimburk”un qonağı olacaq. “Tələbələr” bundan əvvəl səfərdə Monteneqo təmsilçisi “Mornar”a 75:80, evdə isə Türkiyə “Baxçaşəhir”inə 65:80 hesabı ilə uduzub. Son nəticələr və gələcək oyunlar barədə “bayquşlar” 25 yaşlı amerikalı oyunçusu Kivon Devenportla söhbətləşdik:

Sabah vacib oyunlarınızdan birinə çıxacaqsız. Nə deyə bilərsən?
- Bu matça ciddi hazırlaşırıq. Məqsədimiz qələbə qazanmaqdı. Bunu bacara bilərik. Bir plan hazırlayacağıq və meydana çıxıb qələbə üçün mübarizə aparacağıq.

- Əvvəlki iki oyunda uduzmağınızın səbəbi nədi?
- “Mornar”la ilk oyunda texniki səhvlərimiz və qayda pozuntularımız çox oldu. Ən yaxşı oyunçularımızdan Desmond Ronaldı itirdik. Bu da bizə təsir etdi. “Baxçaşəhir”lə oyuna gəlincə, rəqib bizdən daha hazırlıqlı idi. Ancaq yenə də sona qədər mübarizə apardıq. Təəssüf ki, məğlub olduq.

- Səncə komandanın hazırda zəif nöqtəsi haradı?
- Hazırda komandada uyğunlaşma prosesi gedir. Biz hər oyun fərqli rəqiblərə qarşı oynayırıq. Buna görə də müxtəlif tandemlər edirik. İndi kollektivlə birlikdə eyni plan üzrə getmək istəyirik. İnanıram ki, gələcəkdə hər şey “Sabah” üçün daha da yaxşı olacaq.

- Qrupdakı şanslarınız nə qədərdi?
- Qarşıda bizi 4 oyun gözləyir. Qalib gələ bilərik. Buna görə də konsentrasiyanı itirməməli və gələcək matçlara köklənməliyik.

CAVİD ƏLİYEV