“Artıq qrupdakı komandaların zəif və üstün cəhətlərini bilirik”
Xəbər verdiyimiz kimi, "Sabah" çərşənbə günü FİBA Avropa Kubokunun D qrupunda 3-cü oyununa çıxdı.
Azərbaycan çempionu səfərdə Çexiya "Nimburk"una böyük hesabla uduzdu – 61:95 (11:24, 19:22, 17:20, 14:29). Boban Mitevin komandası daha əvvəl səfərdə Monteneqro təmsilçisi “Mornar”a 75:80, evdə isə Türkiyə “Baxçaşəhər”inə 65:83 hesabı ilə məğlub olub. Qrupun digər qaqşılaşmasında “Baxçaşəhər” səfərdə “Mornar”ın müqavimətini qırıb -78:71 (21:28, 21:15, 18:12, 18:16).
“Sabah”ın amerikalı basketbolçusu Mayk Holton son acı məğlubiyyətlə bağlı fikirlərini “Futbol+”lə bölüşdü:
“Planladığımız kimi oynaya bilmədik. Rəqiblərimiz də səhvlərimizdən yararlandı. Çoxlu ötürmələrimiz var idi və hücumda ribaundlara imkan yaratdıq. Rəqibə bizi məğlub etmək üçün lazım olan üstünlüyü verdik. Qarşıdakı oyunlarda qələbə qazanmaq şansımız var. Çünki artıq qrupdakı komandaların zəif və üstün cəhətlərini bilirik. Çox istedadlı, bacarıqlı kollektivimiz var. Səhvlərimiz üzərində işləyəcəyik ki, qarşıda oyunlarda təkrarlamayaq. Qələbələr qazanacağımıza ümid edirik”.
Xatırladaq ki, “Sabah” qrupdakı 4-cü oyunu noyabrın 8-də “Mornar”a qarşı keçirəcək. Həmin oyun saat 19.00-da “Sərhədçi” İdman Mərkəzində start götürəcək.
1. Nimburk 2 2 0 167-150 4
2. Baxçaşəhər 2 1 1 171-154 3
3. Mornar 2 1 1 142-153 3
4. Sabah 2 0 2 140-163 2
