"Sabah” FİBA Avropa Kubokunun müntəzəm mövsümündə keçirdiyi ilk iki oyunda məğlub oldu.

"Tələbələr" səfərdə Monteneqro təmsilçisi "Mornar"a 75:80, evdə isə Türkiyə "Baxçaşəhir"inə 65:83 hesabı ilə uduzdu. Komandanın idman direktoru Elşən Yusubov bu iki qarşılaşma ilə bağlı "Futbol+"in bəzi suallarını cavabladı.

- "Baxçaşəhir"ə bu hesabla uduzmaq sizi təəccübləndirdimi?
- Bəli, "Mornar"la oyunda başabaş mübarizə apardıq. Hətta udmaq şansımız da var idi.  Lakin bilirsiz ki, "Baxçaşəhir" iki mövsüm əvvəl bu turnirin qalibi olub, güclü və təcrübəli komandadı. Türkiyə təmsilçisinə qarşı dördüncü çeyrəkdəki yorğunluq və rəqibin yaxşı atışları bizim məğlubiyyətimizə səbəb oldu.

- Sizcə, qrupdakı şanslarınız nə qədərdi?
- İndi məqsədimiz "Mornar"a səfərdəki görüşdə qalib gəlməkdi. Növbəti tur Çexiyada "Nimburk"un qonağı olacağıq. Mütləq şəkildə qələbəyə köklənmişik. Orda alacağımız qələbə qrupdan çıxmaq şansımızı artıracaq.

- Sizcə, komandanız bu iki oyunun hansında daha çox səhv etdi?
- "Mornar"la matçda hakimlərin qərəzli yanaşmları oldu. Lakin bizim oyunçuların da səhvləri var idi. "Baxçaşəhir"ə qarşı olan səhvlərimizi bağışlamaq olar, lakin "Mornar"la oyundakıları yox. Çünki referi nə qədər qəribə qərarlar versə də, basketbolçular özünü təmkinli apamalıydı.

- Çempionatın ilk turunda "Gəncə"yə qarşılaşacaqsız. Bu oyun barədə nə deyə bilərsiz?
- Rəqib də yaxşı komandadı. Məqsədimiz qələbə qazanmaqdı. Bu mövsüm də çempionluq uğrunda mübarizə aparacağıq.

CAVİD ƏLİYEV