6 mindən çox azarkeşin izlədiyi oyunun ilk dəqiqələrindən hiss olunurdu ki, “Qarabağ” bu görüşdə rahat qələbə qazanacaq.

"Football-plus.az" xəbər verir ki, Ağdam təmsilçisi ilk dəqiqələrdən hücuma atıldı. Komandada hansısa taktiki dəyişiklik olmamışdı.

Sadəcə, son oyunlarda səhvlər edən Şahruddinin əvəzinə Luka meydana çıxmışdı. Kollektiv ənənəvi sistemindən istifadə edərək hücumlar qurmağa çalışırdı. Komandanın heyətində Zubir, Benzya və Leandro Andrade fərqlənirdi.

“Köhlən atlar”ın düşünən beyni isə təbii ki, Yankoviç idi. İlk 30 dəqiqəni ağdamlıların hesabına yazmaq olardı. Demək olar ki, meydan sahibləri, sadəcə, bizimkilərin cərimə meydançasına qədər gələ bilirdi. Qarşılaşmanın 32-ci dəqiqəsində ağdamlılar hesabı açdı. Beznyanın künc zərbəsindən ötürməsini Medina gözəl baş zərbəsi ilə qapıya göndərdi.

Qoldan sonra bizimkilər tonusdan düşmədi. Hətta daha çox hücum edən tərəf “Qarabağ” idi. Qurban Qurbanovun komandası meydanda çox rahat idi. 37-ci dəqiqədə “köhlən atlar” 2-ci topu da vurdu. Lakin Cica oyundankənar vəziyyət olduğu üçün hakim qolu qeydə almadı. Ağdamlılar 7 dəqiqə sonra qol istəyinə çatdı. Sol cinahdan qurulan hücumda Cicanın ötürməsini Andrade qapıya göndərdi.

Fasilədən sonra komandaların heyətində hansısa dəyişiklik olmadı. Sadəcə, ağdamlılar hesabda öndə olmağın gətirdiyi rahatlıqla mübarizə aparırdı. Bundan istifadə edən meydan sahibləri bəzi məqamlarda təhlükəli hücumlar qururdular. Lakin müdafiə xətti və Luka etibarlı oyun nümayiş etdirirdi.

75-ci dəqiqədə Qurban Qurbanov hücumların kəsərinin azaldığını görərək iki yeni futbolçunu döyüşə atdı. Bunlar yeni transfer Silva və Juninyo idi. Qurban Qurbanov braziliyalını əvvəlcə sağ cinah vingeri kimi sınadı. 25 yaşlı futbolçu oyuna rəng qatsa da, iki əlverişli fürsətdən yararlana bilmədi. Belə görünür ki, yeni transfer qrup oyunlarında ağdamlılara çox fayda verəcək.

Ümumiyyətlə, “Qarabağ” komanda şəklində bu dəfə çox yaxşı oyun sərgilədi. Bəlkə də Şahruddinin yoxluğu oyundaşlarında özgüvəni bir qədər də artırmışdı. Sadəcə, Elvinlə Toral ümumi kollektivin performansından bir qədər geri qalırdı.

Beləliklə, ağdamlılar səfərdə çox vacib qələbə qazanaraq Bakıya böyük üstünlüklə döndü. İndi Bakıda, sadəcə, bu işi bitirmək və Avropa Liqasının qrupuna düşmək lazımdı. Orda isə… Necə deyərlər, iştah diş altındadı!

Gözdən qaçmadı
* Oyunu “İdman TV” göstərməli olsa da, azərbaycanlı azarkeşlərin gözü yolda qaldı. Siqnalın ötürülməsindəki problem yalnız 70-ci dəqiqədə həll olundu.
* “Qarabağ”ın heyətində məhz 5 il əvvəl “Olimpiya” ilə oyunda debüt edən Zubirə bu dəfə kapitan sarğısı verilmişdi.
* Oyunu 300-ə yaxın azərbaycanlı azarkeş stadiondan izləyirdi.
* “Qarabağ” bu qələbə sayəsində rekord müəyyənləşdirib. “Köhlən atlar” Avropa Liqasının 2023/24 mövsümündə ardıcıl 3 oyunda qələbə qazanan yeganə komandadı.

İLKİN SULTANLI