Basketbol niyə azarkeşsiz qalıb?
Artıq ölkəmizdə basketbolun yenidən dirçəldiyini deyə bilərik.
Məsələn, ötən mövsüm liqada 8 komanda yarışırdısa, bu mövsüm onların sayı 10-a çatıb. Klubların heyətinə cəlb etdiyi legionerlərin səviyyəsi çempionatımız üçün yetərlidi. “Sabah” Avropa Kubokunda ilk mərhələnu uğurla adları. Lakin bir məqamı təəssüflə qeyd lazımdı ki, bu idman növünün azarkeş kütləsi yoxdu. Oyunlar faktiki boş tribunalar önündə keçirilir. Hətta futbol klublarının da adını daşıyan basketbol komandaları var. Və yaşıl meydanda həmişə doğma komandalarına dəstək verən azarkeşlər eyni formanı daşıyan basketbolçuların da yanında ola bilər. Görəsən, fanklubların bununla bağlı hansısa planı varmı?
Ağaxan Abdullayev (“Soldati Di Sabah” fanklubunun qurucusu):
“Bizim üçün əsas futbol komandamızın oyunlarıdı. “Sabah” basketbol klubunun nümayəndələri ilə də əlaqəmiz yoxdu. Onsuz da Azərbaycanda futbol arenalarını azarkeşlər tam doldura bilmir, qaldı ki, basketbol salonlarını doldursunlar. Bizim fanklubdan bəzi uşaqlar oyunları izləməyə gedir. Hətta fanklub olaraq ötən mövsüm də əsas matçlara getmişdik. Uşaqlarla yığışıb televizordan avrokuboklardakı oyunları da izləyirik. Bəzən elə ola bilər ki, basketbol və futbol oyunları eyni günə düşsün. Bu zaman da məcbur olub futbol matçına gedirik. Amma yenə də deyirəm: biz futbol klubuna dəstək vermək üçün qurulmuşuq. İmkanımız olanda isə basketbol görüşlərinə də gedəcəyik”.
Aqil Məmmədquliyev: (“Neftçi”nin azarkeşlərlə əlaqələndiricisi):
“Azərbaycanda basketbol son vaxtlar inkişaf eləməyə başlayıb. Bunun üçün təbliğat aprılmalıdı. Müəyyən yerlərdə insanların görə biləcəkləri reklam afişaları vurulmalıdı. Bunlar olacağı halda ölkəmizdə bu idman növünə maraq artacaq. Azarkeşlərimizin basketbol oyunlarına getməsinə gəlincə... Bilirsiz ki, “Forza Neftçi” klubdan ayrı rəsmi fanklubdu. Onların adından mən nəsə deyə bilmərəm. İstəsələr, basketbol matçlarına gedərlər. Onsuz da “Neftçi” adı harda varsa, fanatlarımız da orda olur”.
Müşfiq Məmmədov (“Xəmsə”nin üzvü):
“Əslində biz ötən mövsüm basketbol komandamızın oyunlarına gedirdik. Hətta final qarşılaşmalarına da Gəncədən fanatlar gedirdi. Sadəcə, bu il klub rəhbərliyi bizimlə bu məsələ ilə bağlı əlaqə saxlamadı. Bilirsiz ki, kollektivin heyəti də dəyişdi. Ötən il rəhbərlik kubok qazanacaqlarına söz verdi və sonda ölkə kubokunu başımızın üzərinə qaldıra bildik. Lakin bu il “Gəncə” iddialı görünmür. Çempionata da yaxşı start verməmişik. Uğursuz nəticələr də azarkeşləri küsdürür. Məsələn, bizim fanklubun Bakıda da üzvləri var. Bunlar tələbələr və Gəncədən paytaxta işləməyə gedənlərdi. Onların da səfər oyunlarına getmək üçün bəzən vaxtı olmur”.
Digər xəbərlər
