“Qoy əvvəlcə titulları buraxsın, sonra dincələr”
WBC versiyası üzrə superağır çəkinin çempionu Tayson Füri (33-0) ilə ağır çəkidə sabiq UFC çempionu Fransis Nqannu (17-3) arasında Ər-Riyadda, Dünya Boks Şurasının (WBC) xüsusi kəməri uğrunda keçirilən döyüşü haqda məğlumat vermişdik.
10 raundluq döyüşün sonunda Füri hakimlərin qərarı (96-93, 94-95, 95-94) ilə qalib elan olunsa da, 3-cü raundda nokdauna düşdüyünü də unutmayaq.
"Football-plus.az" xəbər verir ki, britaniyalı döyüşçü nokdaunla üzləşməsi haqda danışıb:
"Mən, sadəcə, bir az tənbəl oldum - ona bir-iki nöqtəvi, təmiz zərbə vurdum, ardından yenidən üzərinə atıldım ki, növbəti zərbəni endirim və o, məni əks-hərəkətdə tutdu. Günahlandıracaq kimsə yoxdu. Özüm günahkaram. Məşqçini, meneceri, katmeni günahlandırmaq lazım deyil. Kimisə günahlandırmaq istəyirsizsə, mən varam. Nə olmalıydısa, o da oldu. Bu rəqs deyil, döyüşdü. Sən ora çıxıb döyüşürsən. Heç bir bəhanə yoxdu. Əlimdən gələni etdim, bu qədər... Çətin döyüş oldu, Fransis yaxşı, güclü oğlan idi”.
Nqannunun bu döyüşə hazırlığında iştirak edən superağır çəkidə sabiq mütləq dünya çempionu Mayk Tayson (50-6) da yaxşı mənada təəccübləndiyini deyib:
“Bu, ilk növbədə komanda işi idi, baş məşqçi Dyui Kuperlə birgə çalışdıq. Dediyim kimi, səylərimizi birləşdirdik və gözləmədiyimiz nəticəni aldıq. Yaxın döyüş idi, Nqannu tarixin ən möhtəşəm döyüşçülərindən biri ilə dueldə əla geçə keçirdi. Nqannu üçün son hədd səmadı. Mənə artıq onun həyat tarixçəsi ilə maraqlanan çoxlu adam zəng edib”.
Füri – Nqannu döyüşü arxada qalandan sonra qaydasız döyüş həvəskarları üçün daha bir sual aktuallaşıb. Bildiyiniz kimi, britaniyalının WBA, IBF və WBO versiyaları üzrə superağır çəkinin çempionu – ukraynalı Aleksand Usik ilə döyüşünü bütün dünyada böyük maraqla gözləyirlər. Amma “Queensberry Promotions” şirkətinin rəhbəri Frenk Uorren həmin döyüşün 2023-cü ildə keçirilməyəcəyini təsdiqləyib. İnsayder Maykl Benson X sosial şəbəkəsində belə paylaşım edib:
“Uorren iddia edir ki, WBA, WBC, IBF və WBO versiyaları üzrə mütləq dünya çempionu titulu uğrunda döyüş, çox güman, gələn il yanvarın sonunda və ya fevralda keçiriləcək”.
Usik isə bu paylaşıma belə reaksiya verib:
“Frank dayı bəzi çirkin şeylər danışır. Əlimizdə müqavilə var, orda göstərilib ki, döyüş dekabrın 23-də keçirilməlidi. Qoy Füri əvvəlcə titulları buraxsın, sonra dincələr. Tayson, biz döyüşməliyik, biz bunu dekabrın 23-də etməliyik. Rinqdə görüşərik. Mən səni sevirəm”.
Digər xəbərlər
